7:224  que  si  nous  voulons  contempler  nostre  salut,  que  nous  eslevions  noz  cueurs  au  dernier  iour.  Ces  chiens  abbayent  que  c'est  en  vain,  et  que  desia  nous  sommes  ressuscitez,  sans  qu'il  y  ait  plus  d'autre  resurrection.  Les  tesmoignages  sont  si  evidens  que  rien  plus,  pour  monstrer  que  noz  corps,  qui  sont  maintenant  corruptibles  et  subiectz  a  toutes  povretez,  resusciteront  en  immortalite  glorieuse:  et  pareillement  ceux  des  infideles,  en  ignominie  perpetuelle  (Iehan  5,  29).  S'il  n'y  avoit  point  de  resurrection  pour  nous,  dict  sainct  Paul  (i  Cor.  15,  14.  17),  il  s'ensuit  que  Iesus  Christ  n'est  point  ressuscite,  que  l'Evangile  n'est  que  mensonge,  que  la  foy  est  aneantie.  Pareillement  ceste  doctrine  nous  est  tant  souvent  reiteree,  que  le  Seigneur  Iesus  viendra  lors  en  maieste  avec  ses  Anges,  pour  prononcer  la  sentence  derniere,  et  appeller  [page  185]  les  enfans  de  Dieu  en  leur  pleine  possession  de  leur  heritaige  celeste,  et  envoyer  les  meschans  en  enfer,  pour  separer  les  boucz  des  agneaux,  pour  accomplir  en  ses  membres  l'oeuvre  de  la  redemption  qu'il  a  faicte  (Matth.  25,  31).  Ces  pourceaux  au  contraire  renversent  avec  le  groing  toute  ceste  doctrine:  disant,  qu'il  ne  reste  plus  rien  apres  que  le  cuider  est  aboly:  et  qu'il  suffist  que  l'esprit  s'en  retourne  a  Dieu,  en  partant  du  corps.  Car  adonc,  selon  leur  advis,  ii  est  en  son  droit  lieu  et  en  sa  perfection.  Par  cela  voyons  nous  qu'ilz  achevent  aussi  perversement,  qu'ilz  commencent.  Car  tout  ainsi  qu'en  parlant  de  la  creation  des  hommes,  et  de  toutes  les  oeuvres  de  Dieu,  ilz  confondent  Dieu  avec  le  Diable:  aussi  quand  ce  vient  a  la  restitution  de  tout,  ilz  renversent  entierement  ce  qui  en  est  dict  en  l'Escriture,  avec  l'esperance  de  nostre  salut,  ne  nous  laissant  rien  sinon  la  vie  presente,  pour  j  passer,  et  puis  n'estre  rien.  Parquoy  estans  advertis  de  ce  blaspheme  execrable,  vivons  [page  186]  en  l'esperance  que  Dieu  nous  donne  tant  claire  et  tant  certaine  par  toute  l'Escriture.  C'est  que  le  Seigneur  Iesus  apparoistra  des  cieux  en  son  temps:  et  que  ceux  qui  seront  decedez  au  paravant,  et  desquelz  les  corps  ont  este  pourris  en  terre  ressusciteront  tous  au  son  de  la  trompette  :  c'est  a  dire,  par  la  voix  de  l'Archange  qui  les  adiournera  au  iugement:  et  que  ceux  qui  seront  alors  survivans,  seront  changez  en  un  moment:  que  tous  ensemble  estans  renouvelez  viendront  au  devant  du  iuge  pour  se  presenter  devant  sa  maieste  (1  Thess.  4,  16  s.;  1  Cor.  15,  51).  Qu'alors  les  enfans  de  Dieu  recevront  le  salaire  de  leur  esperance:  et  que  la  beatitude  qu'ilz  attendent  maintenant,  leur  sera  revelee:  qu'ilz  la  verront,  dis-ie,  pleinement,  et  face  a  face,  au  lieu  qu'elle  leur  est  maintenant  cachee,  quant  au  sens  humain.  Qu'alors  donc  nous  serons  introduictz  en  la  possession  de  nostre  heritaige,  lequel  nous  est  promis  en