51:224  quam,  vertendo  mundatam,  pervertere  quod  erat  longe  maioris  momenti,  nempe  ut  soli  Deo  relinquatur  mundandi  officium.  In  verbo.  Additio  minime  supervacua.  Nain  verbo  sublato,  perit  tota  vis  sacramentorum.  Quid  enim  aliud  sunt  sacramenta  quam  verbi  sigilla?  Atque  una  haec  consideratio  quamlibet  superstitionem  nobis  excutiet.  Unde  enim  fit  ut  in  signis  obstupescant  superstitiosi,  nisi  quia  mentes  non  advertunt  ad  verbum,  quod  eos  ad  Deum  dirigeret?  Sane  ubi  alio  respicimus  quam  ad  verbum,  nihil  sani,  nihil  puri:  sed  alia  ex  aliis  deliria  nascuntur:  et  tandem  quae  Dei  autoritate  consecrata  in  hominum  salutem  fuerant  signa,  profanescunt  ac  degenerant  in  crassas  idololatrias.  Adeoque  solo  verbo  differunt  piorum  sacramenta  ab  omnibus  infidelium  figmentis.  Porro  verbum  promissionem  hic  significat,  qua  vis  et  usus  signi  explicatur.  Unde  apparet,  nullam  in  papatu  legitimam  esse  signorum  observationem.  Nam  verbum  quidem  se  habere  iactant,  sed  quod  sit  incantationis  vice:  quia  illud  lingua  incognita  demurmurant:  et  ita  quasi  mortuo  elemento  potius  quam  hominibus  destinatum  foret.  Nulla  mysterii  explicatio  ad  populum,  quae  sola  facit  ut  mortuum  elementum  incipiat  esse  sacramentum.  In  verbo  tantum  valet  atque  per  verbum.  27.  Sisteret  eam  sibi  gloriosam.  Finem  baptismi  et  ablutionis  nostrae  declarat:  ut  sancte  et  inculpate  Deo  vivamus.  Neque  enim  ideo  nos  purgat  Christus  ut  protinus  revolvamur  in  nostras  sordes,  sed  ut  tota  vita  puritatem  retineamus  semel  ab  ipso  acceptam.  Atque  hanc  quidem  primum  sub  figura  describit,  quae  argumento  conveniebat.  Ut  sit  speciosa,  inquit.  Nam  sicuti  formae  elegantia  in  uxore  causa  est  amoris,  ita  Christus  ecclesiam  sponsam  suam  ornat  sanctitate,  ut  sit  hoc  benevolentiae  pignus.  Quare  hac  metaphora  alludit  ad  coniugium:  sed  postea  rem  ipsam  absque  figura  exprimit,  dicens,  Christum  sibi  conciliasse  ecclesiam  quae  sancta  sit  et  irreprehensibilis.  Hic  ergo  verus  est  ecclesiae  decor,  haec  pudicitia  coniugalis,  nempe  sanctitas  et  innocentia.  Sistendi  verbo  significat  Paulus,  in  oculis  Domini,  non  hominum  opinione,  sanctam  debere  esse  ecclesiam.  Dicit  enim,  ut  sibi  sisteret,  non  ut  aliis  ostenderet.  Quamquam  arcanae  istius  puritatis  fructus  in  externis  postea  operibus  apparent.  Quod  autem  Pelagiani  hoc  testimonio  se  armabant  ad  probandam  iustitiae  perfectionem  in  hac  vita:  in  eo  prudenter  ab  Augustino  refutati  sunt.  Neque  enim,  quid  iam  factum  sit,  Paulus  commemorat:  sed  in  quem  finem  Christus  mundaverit  ecclesiam.  Quum  autem  aliquid  dicitur  esse  factum  ut  aliud  postea  sequatur,  stulte  et  perperam  inde  quis  inferat,  hoc  posterius,  quod  sequi  debet,  iam  esse  factum.  Quamquam  non  negamus  iam  inchoatam  esse  ecclesiae  sanctitatem:  sed  male  per-