50:224  quum  iurisconsulti  plures  modos  enumerent,  quibus  finiatur  tutela:  ideo  est  quod  hic  solus  modus  congruebat  similitudini.  Iam  excutiamus  singulas  partes.  Quidam  aliter  accomodant  similitudinem:  nempe  ad  unumquemque  hominem:  quum  Paulus  de  duobus  populis  loquatur.  Fateor  quidem  verum  esse  quod  dicunt:  sed  nihil  ad  praesentem  locum.  Electi,  inquiunt,  tametsi  filii  Dei  sunt  ab  utero,  donec  tamen  fide  in  libertatis  possessionem  veniant,  sub  lege  manent  servis  similes:  cognito  autem  Christo,  hoc  genere  tutelae  non  amplius  indigent.  Ut  hoc  totum  concedam,  nego  hic  Paulum  de  singulis  hominibus  tractare:  nego  eum  distinguere  inter  tempus  infidelitatis  et  vocationis  ad  fidem.  Sed  de  hoc  disputat,  quum  una  sit  Dei  ecclesia,  qui  fit  ut  diversa  sit  nostra  et  Israelitarum  conditio?  quum  fide  simus  liberi,  qui  fit  ut  illi,  qui  communem  nobiscum  fidem  habuerunt,  eiusdem  nobiscum  libertatis  compotes  non  fuerint?  quum  ex  aequo  simus  omnes  filii  Dei,  qui  fit  ut  a  iugo,  quod  coacti  sunt  portare,  simus  hodie  immunes?  De  his  enim  controversia  et  certamen  erat:  non  autem  qualiter  lex  unicuique  nostrum  dominetur,  antequam  per  fidem  liberemur  ab  eius  servitute.  Sit  ergo  ante  omnia  hoc  constitutum,  Paulum  hic  ecclesiam  israeliticam,  quae  sub  vetere  testamento  fuit,  conferre  cum  ecclesia  christiana:  ut  inde  pateat  quid  inter  nos  conveniat,  et  quid  alii  ab  aliis  differamus.  Haec  comparatio  uberrimam  doctrinam  continet,  atque  inprimis  utilem.  Primo  hinc  colligimus,  eiusdem  haereditatis  spem  fuisse  patribus  sub  vetere  testamento,  quam  hodie  habemus:  quia  eiusdem  adoptionis  participes  fuerunt.  Non  enim  (quemadmodum  somniant  fanatici  quidam,  et  inter  alios  Servetus)  in  hoc  tantum  electos  fuisse  a  Deo  Paulus  docet,  ut  nobis  aliquem  Dei  populum  figurarent,  sed  ut  nobiscum  essent  filii  Dei:  et  nominatim  testatur,  non  ad  eos  minus  quam  ad  nos  pertinere  spiritualem  benedictionem  Abrahae  promissam.  Secundo  colligimus,  in  externa  servitute  nihilominus  liberas  fuisse  ipsorum  conscientias.  Neque  enim  Mosem,  Danielem,  pios  omnes  reges,  sacerdotes  ac  prophetas  et  totum  chorum  fidelium  impediebat  adstrictio  servandae  legis,  quin  spiritu  essent  liberi.  Ergo  iugum  legis  ita  in  humeris  portabant,  ut  libero  interea  spiritu  Deum  colerent:  praesertim  vero  de  gratuita  peccatorum  remissione  edocti,  conscientias  haberent  a  peccati  et  mortis  tyrannide  solutas.  Inde  constituendum  est,  eandem  semper  fuisse  doctrinam,  et  vera  fidei  unitate  nobiscum  fuisse  coniunctos,  unius  etiam  mediatoris  fiducia  nobiscum  fretos,  Deum  patrem  invocasse  et  eodem  spiritu  fuisse  gubernatos.  His  omnibus  consentaneum  est,  'discrimen  inter  nos  et  veteres  patres  non  in  substantia  esse,  sed  in  accidentibus.  Nam  quae  praecipua  sunt  in  testamento  vel  foe-