29:224  Iesus  Christ.  Et  voila  pourquoy  aussi  il  declare  a  ses  disciples  qu'il  sera  avec  eux  iusques  en  la  fin  du  monde:  cela  s'estend  iusques  a  tout  le  corps  de  l'Eglise.  Cognoissons  donc,  puis  que  nostre  Seigneur  Iesus  Christ  prononce  que  iamais  il  ne  sera  separe  de  nous,  qu'en  luy  nous  avons  Dieu  qui  desployera  toute  sa  vertu  pour  nous  maintenir:  mais  cependant  c'est  beaucoup,  qu'avec  la  promesse  nous  ayons  encores  les  tesmoignages,  qu'il  nous  monstre  comme  la  chose  accomplie  au  doigt,  ainsi  qu'il  en  est  ici  parle,  quand  nous  lisons  que  Iosue  a  este  rempli  de  l'Esprit  de  sagesse.  Car  pourquoy  cela  s'est-il  fait?  il  n?est  point  advenu  de  cas  d'aventure.  Et  Dieu  n'a  point  eu  esgard  a  luy  seul:  mais  c'est  d'autant  qu'il  s'est  voulu  monstrer  le  salut  des  Iuifs.  Or  auiourd'huy  nous  sommes  en  mesme  degre:  car  s'ils  fussent  demeurez  en  la  maison  de  Dieu,  nous  serions  conioints  avec  eux:  d'autant  qu'ils  s'en  sont  bannis,  et  ^qu'ils  sont  retranchez,  comme  membres  pourris,  nous  obtenons  leur  place,  comme  dit  sainct  Paul.  Or  donc  sachons  que  Dieu  iamais  ne  permettra  que  nous  soyons  destituez  de  ce  qui  est  requis  a  nostre  salut,  que  tousiours  il  ne  nous  monstre  son  amour  et  sa  faveur  envers  nous,  et  qu'il  nous  veut  provoir  de  ce  qui  nous  sera  utile,  quand  nous  aurons  nostre  refuge  a  luy:  voire  combien  que  nous  n'en  soyons  pas  dignes.  Car  de  ce  peuple  nous  savons  quel  il  a  este,  et  combien  de  fautes  et  offenses  il  a  commises  :  et  il  ne  se  falloit  point  esbahir  si  Dieu  les  eust  du  tout  abysmez.  Or  maintenant  qu'il  les  prouvoit  de  gens  qui  soyent  propres  et  idoines  pour  les  maintenir:  en  cela  cognoist-on  comme  Dieu  par  sa  misericorde  a  combattu  contre  la  malice  de  ce  peuple.  Et  ainsi  donc  quand  nous  serons  tentez  de  desfiance,  pource  que  nous  sommes  redarguez  de  nos  pechez,  recourons  a  la  misericorde  de  Dieu,  et  prionsle  qu'il  ne  vueille  point  avoir  esgard  a  nos  offences:  mais  quelque  indignite  qu'il  y  ait  en  nos  personnes,  qu'il  ne  laisse  pas  de  tousiours  continuer  sa  bonte  et  sa  grace  sur  nous.  Voila  donc  quant  a  cest  article.  Il  y  a  maintenant  une  question  qu'on  pourroit  faire,  comme  il  est  dit:  Que  quand  Moyse  a  mis  les  mains  sur  Iosue,  il  a  este  rempli  de  sagesse,  assavoir  si  les  mains  d'un  homme  ont  une  telle  vertu?  mais  quand  il  est  parle  du  signe,  il  nous  faut  venir  a  la  chose.  Nous  savons  qu'en  toutes  les  benedictions  solennelles,  ce  signe-la  estoit  de  mettre  les  mains  dessus.  Or  ce  n'a  pas  este  une  invention  follement  controuvee,  ainsi  que  les  hommes  auront  beaucoup  de  singeries:  mais  c'estoit  un  tesmoignage  approuve  de  Dieu,  comme  si  on  luy  eust  fait  oblation  de  celuy  qui  estoit  ainsi  benit.  Quand  les  saincts  Patriarches  ont  benit  leurs  enfans,  c'estoit  comme  s'ils  leur  eussent  donne  asseurance  que  l'heritage  de  salut  leur  appartenoit,