1:224  [CO  1.  224]  quid  sit  in  religionis,  hoc  est  coelestis  sapientiae  causa,  a  solo  Dei  ore  pendere,  simul  viderent,  non  levem  esse  rationem,  cur  perversa  huiusmodi  obsequia  sic  abominetur  Dominus,  quae  pro  humani  ingenii  libidine  sibi  praestantur.  Nam  tametsi  speciem  habent  quandam  humilitatis  in  sua  hac  obedientia,  qui  legibus  in  Dei  cultum  parent,  minimo  tamen  sunt  coram  Deo  humiles,  cui  easdem  praescribunt  leges  quas  ipsi  servant. [p. 461]  Haec  vero  ratio  est,  cur  tam  diligenter  vult  nos  cavere  Paulus  (Col.  2),  ne  decipiamur  per  traditiones  hominum,  et  illam,  quam  vocat  ἐθελοθρησκείν,  id  est,  voluntarium  cultum  et  praeter  verbum  Dei  ab  hominibus  excogitatum.  Sic  est  profecto.  [OS  254]  Stultescere  et  nostram  nobis  ipsis  et  omnium  hominum  sapientiam  oportet,  quo  solum  illum  sapere  permittamus.  Quam  viam  minime  tenent,  qui  confictis  hominum  arbitrio  observatiunculis,  illi  se  approbare  meditantur.  Qualiter  et  aliquot  antea  saeculis  et  nostra  memoria  factum  est,  et  fit  hodie  quoque  in  iis  locis,  in  quibus  creaturae  pluris  est,  quam  creatoris  imperium.  Ubi  religio  (si  tamen  religio  vocari  ea  meretur)  pluribus  magisque  insulsis  superstitionibus  conspurcata  est,  quam  ulla  unquam  paganitas.  Quid  enim  posset  parere  hominum  sensus,  quam  carnalia  fatuaque  omnia  et  quae  suos  autores  vere  referant?  Porro  istud  pessimum  accedit,  quod  ubi  talibus  vanis  figmentis  definiri  religio  semel  coepta  est,  perversitatem  illam  perpetuo  sequitur  et  altera  execrabilis  maledictio,  quam  Pharisaeis  Christus  exprobrabat  (Matth.  15):  ut  irritum  fiat  praeceptum  Dei,  propter  hominum  traditiones.  Nolo  iam  contra  praesentes  nostros  nomothetas  verbis  meis  pugnare.  Vicerint  sane,  si  hanc  Christi  accusationem [p. 462]  in  se  non  competere  excusare  poterunt.  Sed  quomodo  excusarent,  cum  immenso  apud  eos  sceleratius  sit,  auricularem  confessionem,  vertente  anno,  praetermisisse,  quam  nequissimam  vitam  in  solidum  annum  produxisse;  linguam  die  veneris  infecisse  modico  carnis  gustu,  quam  totum  corpus  diebus  omnibus  scortationibus  foedasse;  manum  die  festo  admovisse  honesto  operi,  quam  pessimis  facinoribus  assidue  exercere  membra  omnia;  sacrificum  legitimo  uno  connubio  copulari,  quam  illigari  mille  adulteriis;  votivam  peregrinationem  non  persolvere,  quam  in  promissis  omnibus  fidem  fallere;  in  prodigiosos,  nec  minus  supervacuos  ac  inutiles  templorum  luxus  non  aliquid  profudisse,  quam  defuisse  urgentissimis  pauperum  necessitatibus;  idolum  sine  honore  praeteriisse,  quam  hominum  omne  genus  contumeliose  tractasse;  non  demurmurasse  certis  horis  longa  sine  sensu  verba,  quam  veram  orationem  animo  nunquam  concepisse?  Quid  est,  irritum  facere  propter  suas  traditiones  Dei  praeceptum,  nisi  hoc  est?  Cum  observationem  mandatorum  Dei  frigide