47:223  223  IN  EVANGELIUM  IOANNIS  224  opinione  sanctimoniae  turgerent,  eos  praecipue  vulnerabat  evangelii  doctrina,  quae  damnabat  fictitias  omnes  eorum  iustitias:  praesertim  vero  asserendae  legis  praetextu  pro  sua  potentia  et  regno  dimicabant.  Quod  evangelista  caecum  a  turba  ad  Pharisaeos  adductum  esse  commemorat,  incertum  est  quo  affectu  et  consilio  factum  id  fuerit.  Vix  quanquam  tunc  latebat,  quam  hostiliter  infensi  Christo  essent  Pharisaei:  fieri  ergo  potest  ut  multi  adulatores  in  eorum  gratiam  data  opera  miraculi  gloriam  obruere  tentarint.  Mihi  tamen  probabile  est,  maiorem  partem  plebis  suspenso  iudicio,  ut  fieri  solet,  arbitros  ac  iudices  facere  voluisse,  qui  gubernacula  tenebant.  Interea  ultro  caecutientes  in  sole  tenebras  sibi  accersunt  quae  illius  obscurent  lucem.  Haec  praepostera  est  vulgi  religio,  ut  impios  ecclesiae  tyrannos  divinae  reverentiae  praetextu  adoret,  Deum  vero  ipsum  tam  in  verbo  suo  quam  operibus  contemnat,  vel  saltem  respicere  non  dignetur.  14.  Erat  autem  sabbatum.  Consulto  diem  sabbati  elegit  Christus,  qui  scandali  materiam  praebiturus  erat  Iudaeis.  Iam  satis  in  paralytico  expertus  erat,  hoc  quoque  opus  calumniae  fore  obnoxium.  Cur  ergo  offensionem,  quod  illi  facillimum  erat,  non  praecavet,  nisi  quod  maligne  suscepta  ab  hostibus  defensio  ad  illustrandam  Dei  virtutem  factura  erat  ?  Dies  sabbati  ad  illos  acuendos  instar  cotis  est,  ut  acrius  de  tota  re  inquirant.  Quid  vero  tandem  ex  quaestione  sedulo  et  anxie  habita  proficiunt,  nisi  quod  miraculi  veritas  clarius  refulget?  Caeterum  hoc  exemplo  docemur,  ut  Christum  sequamur  exasperandos  esse  evangelii  hostes  :  ac  eos  prorsus  desipere  qui  sic  conciliant  mundum  Christo,  ut  quasvis  offensiones  damnent,  quum  potius  Christus  sciens  ac  volens  impios  irritaverit.  Tenenda  ergo  quam  alibi  praescribit  regula:  caecos  ac  duces  caecorum  negligendos  esse  (Matth.  15,  14).  15.  Interrogarunt  eum  etiam  Pharisaei.  Hanc  confessionem  ex  ore  caeci  iam  ante  populus  audierat:  nunc  eius  testes  Pharisaei  quoque  fiunt  qui  obi  cere  poterant,  rumorem  sine  capite  temere  excitatum  ab  hominibus  plebeiis  non  minus  temere  fuisse  exceptum.  Ac  primo  quidem  omissa  facti  quaestione,  ut  loquuntur,  de  iure  tantum  disputant:  non  enim  negant  quin  visum  Christus  caeco  restituerit,  sed  crimen  inveniunt  in  circumstantia  temporis,  ac  negant  Dei  esse  opus  quo  violatum  fuit  sabbatum.  Sed  primo  quaerendum  erat,  an  divinum  opus  esset  sabbati  violatio.  Quid  autem  obstat  quo  minus  hoc  videant,  nisi  quia  pravo  affectu  et  malitia  excaecati  nihil  vident?  Adde  quod  iam  prius  satis  superque  edocti  fuerant  a  Christo,  non  magis  cum  sabbato  pugnare  quae  Deus  hominibus  largitur  beneficia  quam  circumcisionem:  et  legis  verba  homines  a  suis  tantum,  non  Dei  operibus  quiescere  iubent  (Exod.  20,  8).  Quod  ergo  errorem  pro  con-