5:222  Et  ipsi  vitiose  colligunt,  quibus  est  cum  illis  commune  argumentum.  Simile  fere  est  illud  Ecclesiastici:  Numerus  annorum  hominis,  ut  multum,  centum  anni,  quasi  guttae  aquae  maris  deputati  sunt,  et  sicut  calculus  arenae,  sic  exigui  anni  in  die  aevi.  Propter  hoc  patiens  est  Deus  in  illis,  et  effundit  in  eos  misericordiam  suam  (Eccles.  18,  8  ss.).  Fatendum  igitur  illis,  longe  diversam  fuisse  prophetae  sententiam,  ab  ea  quam  somniant.  Dominum  esse  eorum  misertum  quos  agnosceret,  sola  sua  misericordia  stare,  a  quibus  si  paulisper  manum  retraheret,  eos  in  pulverem  redituros,  unde  sumpti  essent.  Deinde  subiicit  brevem  humanae  vitae  descriptionem:  eam  flori  comparans,  qui  dum  hodie  viret,  nihil  aliud  est,  quam  crastinum  foenum.  Quod  si  pronunciasset  spiritum  hominis  perire  et  decidere  in  nihilum,  ne  sic  quidem  armasset  ipsorum  errorem.  Nam  quum  dicimus  spiritum  hominis  esse  immortalem,  non  affirmamus  contra  manum  Dei  stare  posse,  aut  sine  eius  virtute  subsistere.  Absint  a  nobis  hae  blasphemiae.  Sed  dicimus,  eius  manu  ac  benedictione  sustineri.  Sic  Irenaeus,  1)  qui  nobiscum  spiritus  immortalitatem  asserit,  vult  tamen,  discamus,  natura  nos  mortales  esse,  solum  autem  Deum  immortalem.  Et  eodem  loco:  Ut  non  quasi  ex  nobis  habentes  vitam,  inflemur  aliquando,  et  extollamur  adversus  Deum:  experimentoque  discamus,  quoniam  ex  illius  magnitudine,  et  non  ex  nostra  natura  habemus  in  aeternum  perseverantiam.  Haec  igitur  nobis  pugna  est  cum  Davide,  quem  faciunt  nobis  tantopere  adversarium.  Ille  ait  hominem,  si  ab  eo  auferat  suam  misericordiam  Dominus,  ruere  ac  perire  (Psal.  104,  29).  Nos  docemus,  Dei  benignitate  ac  virtute  sustineri:  quoniam  ipse  solus  habet  immortalitatem  (1  Tim.  6,  16):  et  quidquid  est  vitae,  ab  eo  est.  [fol.  43]  Quartum.  Satiata  est  malis  anima  mea,  et  vita  mea  inferno  appropinquavit:  aestimatus  sum  cum  descendentibus  in  lacum,  sicut  homo  sine  adiutorio,  sicut  interfecti  dormientes  in  sepulcris,  quorum  non  es  memor  amplius,  et  qui  de  manu  tua  abscissi  sunt  (Psal.  88,  4  ss.).  Quid,  inquiunt,  si  abscissi  sunt  a  virtute  Dei,  si  providentia  eius  et  memoria  exciderunt,  nonne  esse  desierunt?  Quasi  vero  non  liceat  mihi  retorquere:  Quid?  si  abscissi  sunt  a  virtute  Dei,  si  memoria  exciderunt,  quomodo  rursum  erunt?  Et  ubi  erit  resurrectio?  Rursum,  qui  convenient  isthaec?  Iustorum  animae  in  manu  Dei  sunt  (Sapient.  3,  1).  Aut,  ut  certis  Dei  oraculis  agamus:  In  memoria  aeterna  erit  iustus  (Psal.  112,  6).  Non  igitur  exciderunt  a  manu  Domini,  nec  memoriam  eius  fugerunt.  Quin  potius  hoc  loquendi  1)  Iren.  libr.  Y.  adversus  haeres.