29:222  bonne  fin,  quand  nostre  Seigneur  retire  de  ce  monde  ceux  que  nous  devons  regretter  et  desirer:  qu'aussi  nous  ayons  quelque  reigle,  et  que  nous  ne  soyons  point  transportez  en  nos  fascheries  pour  nous  despitter:  mais  que  le  tout  soit  adouci,  d'autant  que  nous  cognoistrons  qu'apres  que  Dieu  nous  aura  chastiez,  il  veut  moderer  sa  main  forte,  et  ne  veut  point  la  desployer  contre  nous:  mais  qu'il  nous  chastie  en  verge  d'homme,  comme  il  en  est  parle.  Quand  nous  voyons  cela,  que  nous  apprenions  de  nous  consoler  et  estre  patiens.  Or  cependant  nous  avons  encores  un  article  a  observer,  c'est  que  les  peres  anciens  ont  eu  plus  de  ceremonies  que  nous,  a  cause  qu'ils  n'avoyent  pas  un  tesmoignage  si  clair  de  la  vie  eternelle:  comme  il  y  en  a  eu  une  mesme  raison  a  la  sepulture,  sous  la  Loy  on  a  enseveli  les  hommes  avec  plus  grande  pompe  qu'auiourd'huy.  La  raison?  pource  que  la  resurrection  n'estoit  pas  encores  si  bien  testifiee  comme  elle  est.  Il  est  vray  que  les  peres  ont  bien  cogneu  ce  qui  estoit  requis  a  leur  salut,  mais  c'a  este  sous  ombrages  et  figures.  Auiourd'huy  voila  Dieu  qui  nous  appelle  du  ciel:  nostre  Seigneur  Iesus  Christ  nous  monstre  que  comme  il  est  ressuscite  en  gloire,  que  nous  serons  conformes  a  son  image:  et  pour  cela  que  nous  n'avons  plus  besoin  de  telles  aides  qu'ont  eu  les  peres  anciens.  Ainsi  donc  ce  seroit  une  singerie  de  vouloir  auiourd'huy  contrefaire  ce  qui  a  este  observe  en  l'ancien  testament.  Et  voila  enquoy  nous  voyons  la  sottise  des  Papistes:  car  ils  ont  voulu  contrefaire  toutes  choses  sans  propos  ni  raison.  Et  on  voit  qu'en  leurs  sepultures  ils  ont  tant  de  badinages  et  de  menus  fatras,  qu'on  y  est  confus.  Et  qui  en  est  cause,  sinon  qu'ils  ne  cognoissent  point  la  diversite  qui  a  este  depuis  la  venue  de  nostre  Seigneur  Iesus  Christ,  c'est  que  les  ceremonies  anciennes  ont  prins  fin?  Voila  donc  les  Papistes  qui  sont  Iuifs,  voire  des  Iuifs  bastards:  car  les  Iuifs  non  sans  cause  ont  eu  un  tel  usage,  pource  qu'il  falloit  que  les  ceremonies  suppleassent  au  defaut  de  la  doctrine.  Mais  auiourd'huy  que  Iesus  Christ  est  apparu,  et  qu'en  sa  personne  nous  avons  la  resurrection  qui  nous  est  manifestee  :  quand  on  s'amusera  apres  tant  d'ombrages  et  de  figures,  qu'est-ce  sinon  aneantir  la  resurrection  de  nostre  Seigneur  Iesus  Christ?  esteindre  toute  la  clarte  de  l'Evangile?  Voila  pourquoy  i'ay  dit  que  les  Papistes  ne  sont  pas  dignes  d'estre  appellez  Iuifs,  mais  ce  sont  Iuifs  bastards.  Or  de  nostre  coste  apprenons,  quand  il  est  dit  :  Que  Ie  peuple  a  mene  dueil  par  V  espace  de  trente  iours,  qu'il  a  fallu  que  les  peres  anciens  fussent  retenus  en  bride,  a  cause  que  Dieu  ne  leur  avoit  point  donne  tesmoignage  si  ample  de  la  vie  eternelle:  et  selon  leur  rudesse,  qu'ils  ont  este  gouvernez  en  petis  enfans,  ainsi  que  sainct  Paul  en  parle  aux  Galatiens.  De  nostre  coste  que