27:222  ici  en  dispute  avec  luy  pour  le  recompenser  en  un  endroict,  si  nous  avons  failli  en  l'autre:  mais  que  sa  Loy  soit  observee,  voire  selon  son  contenu,  et  sa  substance.  Car  si  ie  vouloye  recevoir  un  contract,  ou  quelque  instrument  publique,  et  cependant  dire  :  Quant  a  ce  poinct-la,  quant  a  cest  article,  ie  ne  le  veux  point  admettre:  et  que  seroit-ce?  C'est  falsifier  le  tout.  Ainsi  apprenons  que  pour  honorer  Dieu,  et  pour  luy  rendre  obeissance,  il  faut  que  sa  parolle  soit  authorisee,  nous  submettans  du  tout  a  icelle.  Voila  pour  un  item.  Et  quand  Moyse  dit  Auiourd'huy,  c'est  en  sommant  le  peuple,  afin  que  sans  delay  il  suyve  quand  Dieu  l'appelle.  Car  est-ce  peu  de  chose,  que  nostre  Seigneur  se  communique  si  privement  k  nous?  Il  ne  faut  point  donc  que  nous  demandions  terme  pour  deliberer:  si  tost  que  Dieu  a  la  bouche  ouverte,  il  faut  que  nous  ayons  les  aureilles  attentives,  et  que  sans  delay  nous  respondions  du  premier  coup  a  sa  parolle,  pour  nous  y  assuiettir.  Et  cela  n'est  pas  seulement  pour  nous  advertir,  quelle  promptitude  nous  devons  avoir  a  suyvre  sa  Loy:  mais  nous  oyons  ce  qui  est  dit  au  Pseaume:  Auiourd'huy  si  vous  escoutez  sa  voix:  qu'en  general  nostre  Seigneur  veut  que  si  tost  qu'il  a  parle,  qu'on  suyve  son  dire,  et  qu'on  s'y  range.  Et  l'Apostre  en  l'Epistre  aux  Hebrieux  au  troisiesme  chapitre  nous  monstre  quel  est  ce  iourd'huy:  c'est  assavoir  quand  nostre  Seigneur  nous  fait  la  grace  de  nous  adresser  sa  parolle.  N'attendons  pas  donc  iusques  a  demain:  car  ce  seroit  se  mocquer  par  trop:  et  il  y  a  danger  que  la  porte  ne  nous  soit  close.  Puis  donc  qu'auiourd'huy  Dieu  parle,  qu'il  soit  escoute  promptement,  et  sans  aucun  delay.  Voila  ce  que  nous  avons  a  retenir.  Et  pourtant  si  nous  venons  au  sermon,  ou  qu'un  chacun  lise  l'Escriture  saincte  en  son  prive,  si  tost  que  nous  aurons  ouy  une  sentence,  entrons  en  nous-mesmes:  si  nous  voyons  qu'il  y  ait  de  la  paresse,  qu'on  se  solicite,  qu'on  se  pieque,  que  nous  cognoissions:  O  il  n'est  pas  question  ici  de  se  iouer  avec  Dieu,  et  de  dilayer  de  venir  a  luy:  quand  il  nous  appelle,  il  faut  que  nous  luy  respondions  en  telle  promptitude,  que  ce  qui  nous  est  commande  par  Moyse  soit  accompli,  que  nous  n'ensevelissions  point  la  parolle  de  Dieu,  que  nous  ne  la  laissions  point  pendre  au  crocq:  mais  qu'elle  entre  du  premier  coup  en  nos  coeurs,  et  qu'elle  y  trouve  si  bonne  racine,  qu'elle  y  fructifie.  Voila  en  somme  ce  que  nous  avons  a  noter  de  ce  mot  d'Auiourd'huy.  Or  venons  maintenant  a  ce  que  Moyse  adiouste.  Sans  y  adiouster  (dit-il)  ne  diminuer.  Or  voici  un  passage  excellent,  pour  nous  monstrer  comme  la  vie  des  hommes  sera  bien  reiglee.  Nous  avons  desia  dit,  que  Dieu  esprouve  nostre  suiettion,  quand  nous  recevons  sa  parolle,  et