10.1:222  atque  illic  pedem  figamus.  Atqui  bene  iudicandum,  ubi  malum  non  apparet.  Concedo,  ubi  de  aliquo  pro  fratre  agnoscendo  agitur:  sed  quum  de  instituendo  pastore  agitur,  longe  aliud  examen  requiritur.  Interea  vero  meis  istis  verbis  praeiudicium  cuiquam  fieri  nolim,  quum  qui  sit  nobis  incognitus,  eo  deterior  non  sit  in  sese.  Tantum  hoc  damno  ut  levitatis  et  temeritatis  plenum,  quod  eo  loco  et  ad  tale  munus  hominem  adhibere  audemus,  quem  minus  idonee  exploravimus,  ut  legitimum  de  illo  testimonium  praecedat.  Scriptura  enim  ita  pastorem  probum  esse  vult,  ut  et  talem  agnosci  haberique  praescribat.  Enimvero  si  quis  se  ipsum  ita  immittat  atque  ingerat,  ut  iste  a  vobis  inductus  est,  iam  ipso  ambitionis  notam  sibi  inussit,  ut  non  inquiratur  ulterius.  Ego  sane  malim  pugnum  mihi  praecidi,  quam  ferre  ut  aut  ea  ratione  intromitterer,  aut  intromissus  coenam  ministrarem,  uti  erga  ipsum  a  vobis  hac  in  re  per  tumultum  gesta  sunt  omnia.  Tanti  momenti  est  vel  unum  exemplum.  Pertinet  omnino  ad  pastoris  veri  munus  Mosis  exemplum,  quum  neminem  ex  Domini  populo  non  prophetam  esse  optaret  (Num.  l  l  ,  29).  Agnoscere  etiam  oportet,  adeoque  locum  cedere  quantum  est  in  nobis,  illis,  qui  dona  illa  acceperunt  a  Domino  quae  ad  ecclesiam  aedificandam  conferant:  quod  ad  fratrem  nostrum  spectare  non  dubito,  uti  aperte  ostendit,  quum  illum  admisit  etiam  promptius  quam  ipse  fecissem.  Sed  ut  res  ipsa  per  se  excutiatur,  quis  vobis  suggessit  penes  populum  esse,  ut  pastorem  temere  mutetis,  prout  hic  potius  quam  ille,  huius  vel  illius  oratio  aut  ornatus  in  dicendo  vos  plus  minusve  ceperit:  aut  penes  populum  esse  pronunciare,  placere  sibi  ut  coenam  ministret?  Quin  relegamus  potius  huiusmodi  ambitum  ad  claustra  monachorum,  quum  Dei  ecclesiam  alia  moderatio  prorsus  deceat?  Vos  vero  plus  etiam  audetis  quam  par  sit,  si  ex  una  concione  statim  fertis  sententiam.  Non  pertinet,  ut  puto,  ad  omnes  huius  vitii  notatio.  Nam  vel  unum  susurronem  huius  turbae  autorem  esse  potuisse  mihi  persuadeo.  Quum  tamen  ita  vos  humiliavit  Dominus,  ut  ista  tentatione  abrepti  fueritis,  ego  sane  vobis  vehementius  obstitissem  quam  a  fratre  nostro  factum  sit.  Ut  enim  laudo  ipsius  modestiam,  ita  etiam  motum  illum  insolentem  maiori  severitate  mihi  refraenandum  esse  duxissem.  Accedunt  et  circumstantiae  quae  malum  exaggerant.  Habetis  pastorem  in  carcere  detentum.  Illo  ita  absente  tales  motus  excitare,  an  excusationem  ullam  admittit?  Inter  extraneos  ita  tumultuari,  ut  quum  illos  vobis  una  moderatione  conciliare  debueritis,  iam  ipsorum  iudicio  obnoxios  reddatis,  qui  in  vesstrae  ecclesiae  administratione  tam  praecipitanter  vos  geritis?  Neque  vero  offendi  vos  oporteat  mea  ista  acerbitate.  Si  enim  essem  apud  vos,  vehementius  multo  urgerem  istud  publicum  delictum,  cuius  momentum