5:221  PSYCHOPANNYCHIA.  dunt.  In  quo  non  intelligunt,  se  non  animarum  modo  immortalitatem  abolere,  sed  spem  quoque  resurrectionis  praecidere.  Si  enim  est  resurrectio,  spiritus  certe  redit.  Si  non  redit,  resurrectio  tollitur.  Quamobrem  eos  imprudentiae  culpam  hic  magis  deprecari  convenit,  quam  fortius  instare,  ut  obtineant  tam  perversum  postulatum.  Atque  haec  quidem  in  hoc  tantum  dicta  sint,  ut  videant  omnes,  quantum  pateat  effugium,  si  de  refutandis  eorum  argumentis  tantum  cogitaremus.  Fatemur  enim  libenter,  idque  ex  nostra  ipsorum  sententia,  hic  quadrare  nomen  venti.  Concedimus  homines  ventum  esse  fugientem  nec  redeuntem.  Quod  si  ad  sua  sensa  trahunt,  errant,  nescientes  scripturas:  quibus  mos  est,  per  id  genus  periphrasis  designare,  nunc  humanae  conditionis  imbecillitatem,  nunc  brevitatem  vitae.  Quum  de  homine  dicit  Iob,  florem  esse,  qui  egreditur  et  conteritur,  et  velut  umbram  fugere  (Iob.  14,  2):  quid  aliud,  quam  describere  voluit,  hominem  esse  fluxum  et  fragilem,  et  similem  floris  decidui?  Iesaias  vero  clamare  iubetur  omnem  carnem  foenum  esse,  et  omnem  eius  gloriam,  quasi  florem  foeni:  exsiccatum  esse  foenum,  et  cecidisse  florem:  verbum  autem  Domini  aeternum  permanere  (Ies.  40,  6).  Agedum,  colligant  uno  verbo,  animam  hominis  exarere  et  emarcere:  et  paulo  acutius  cernant,  quam  crassus  ille  piscator  (1  Petr.  1,  24),  qui  ex  eo  probat  fideles  omnes  immortales  esse,  quia  renati  sint  ex  semine  incorruptibili,  hoc  est,  verbo  Dei,  quod  aeternum  permanet.  Eos  vero  scriptura  florem  fluxum  vocat,  et  ventum  praetereuntem,  quibus  fiducia  est  in  hac  vita.  Qui  quasi  hic  sedem  permanentem  fixerint,  regnaturos  se  putant  sine  fine:  nec  eum  finem  [fol.  42]  respiciunt,  quo  sit  mutanda  conditio,  et  alio  demigrandum.  De  quibus  etiam  ait  propheta:  Pepigimus  foedus  cum  morte,  et  cum  inferno  fecimus  pactum  (Ies.  28,  15).  Eorum  vanam  spem  irridens,  non  deputat  ad  vitam,  quod  illis  est  initium  mortis  pessimae.  Ac  desinere  et  mori  eos  affirmat,  quibus  melius  esset  non  esse,  quam  sic  esse.  Simile  est  quod  alio  psalmo  legitur:  Quomodo  miseretur  pater  filiorum,  misertus  est  Dominus  omnium  timentium  se.  Quoniam  ipse  cognovit  figmentum  nostrum:  recordatus  est  quia  pulvis  sumus.  Et  homo,  sicut  foenum,  dies  eius  tanquam  flos  agri,  sic  efflorebit.  Quoniam  spiritus  pertransibit  in  illo,  et  non  subsistet,  et  non  cognoscet  amplius  locum  suum  (Psal.  103,  13  ss.).  Ex  quibus  verbis  si  affirment  spiritum  perire  et  evanescere:  iterum  illis  praedico,  videant  ne  fenestram  aperiant  Epicureis,  si  qui  sint  qui  insurgant,  ac  nostram  eorumque  fidem  de  resurrectione  labefacere  conentur,  ut  certe  multi  sunt.  Eadem  enim  ratione  colligent,  spiritum  in  corpus  non  redire,  quum  dicatur  non  cogniturum  amplius  locum.  Sed  dicent,  vitiose  colligent.  Quoniam  huic  ratiocinationi  aperte  reclamant  loci  de  resurrectione.