30:221  221  IN  I.  LIB.  SAMUEL.  CAP.  XVII.  222  quae  causa  est  cur  saepe  deficiamus,  et  tanto  terrore  percellantur  ab  hostibus  undique  circumsepti,  ut  ne  Deum  quidem  invocare  possimus,  neque  auxilium  ab  ipsius  misericordia  implorare,  nisi  quod  semisepulta  iacent  quaecunque  ab  ipso  benefacta  accepimus?  Contra  vero  David  etiam  profitetur  se  in  summis  difficultatibus  constitutum  dies  antiquos  memoria  repetivisse:  ac  proinde  non  tantum  de  iis  cogitare  quae  ipsemet  quamdiu  vixit  de  Dei  virtute  et  bonitate  erga  se  expertus  est:  sed  etiam  veteres  historias  beneficiorum  Dei  erga  populum  revocare  in  memoriam,  ut  quae  scripta  sunt  in  suum  usum  transferat.  Ac  sane  quum  in  Deo  spem  nostram  collocare  iubemur,  non  sunt  ipsius  beneficia  restringenda  ad  ea  quae  iam  habemus  experientia  comperta:  sed  longius  est  extendenda:  ut  cognoscamus  Deum  inde  ab  omni  saeculo  suos  servasse,  et  in  rebus  angustis  auxilium  ipsis  tulisse.  Hanc  ob  causam  voluit  Deus  veterum  patrum  historias  monumentis  conscribi  et  in  sacram  paginam  conferri,  non  tantum  ut  norimus  Abrahamum,  Mosen,  Davidem  et  alios  patriarchas  Dei  gratia  servatos,  et  in  rebus  angustis  auxilio  divino  adiutos,  sed  ut  liberationes  illas  in  nostrum  usum  et  utilitatem  convertamus.  At  si  ad  fidei  nostrae  confirmationem  debemus  memoria  repetere  quaecunque  beneficia  Deus  in  suam  ecclesiam  contulit,  quanta  erit  ingratitudo,  et  quantus  stupor  non  eorum  meminisse  quae  singuli  a  Deo  benefacta  acceperunt,  et  ex  iis  in  exspectatione  divinae  bonitatis  confirmari?  Ecquis  enim  iam  a  teneris  unguiculis,  quis,  inquam,  non  inde  iam  ab  utero  sensit  quam  bonus  Deus  erga  se,  quam  potens,  quam  munificus  in  eos  qui  ad  ipsum  confugiunt,  et  in  ipso  solo  conquiescunt:  ac  proinde  non  habeat  persuasum,  fideles  ad  Deum  confugientes  sua  spe  nunquam  excisuros?  Sic  itaque  David  fidem  suam  roborabat,  memoria  insignis  illius  divini  erga  se  beneficii,  quo  non  tantum  evaserat  leonis  et  ursi  ungues  et  fauces,  sed  eosdem  interemerat:  cuius  rei  fidem  facit  potissimum  conclusio  ipsius  his  verbis:  Dominus  qui  eruit  me  de  manu  leonis,  et  de  manu  ursi,  ipse  me  liberabit  de  manu  Philistaei  huius.  Quibus  docemur  benefacta  Dei  erga  nos  referenda  esse  in  futurum  tempus:  Deus  enim  sui  semper  est  similis,  neque  eius  unquam  imminuitur  potentia:  et  in  eos  qui  ipsum  invocant  misericors  et  in  auxilium  ipsorum  promptus.  Quandoquidem  igitur  perpetua  est  Dei  bonitas  et  virtus  ac  potentia,  et  immutabilis  voluntas,  facile  possumus  concludere  fore  ut  quemadmodum  nos  hactenus  in  nostris  difficultatibus  et  rebus  angustis  adiuvit,  eundem  se  erga  nos  in  finem  usque  praebeat.  Nae  si  rebus  creatis  Deus  esset  similis,  de  ipsius  constantia  et  fide  merito  dubitaremus,  etsi  hodie  potuit  et  voluit,  crasne  possit  et  velit  in  dubium  vocare.  Nam  homines  non  habent  semper