27:221  221  SUR  LE  DEUTER.  CHAP.  XII.  222  il  n'y  a  point  d'autre  chemin  certain.  Venons  maintenant  a  la  conclusion  que  Moyse  adiouste,  Tu  feras  tout  ce  que  ie  te  commande  auiourd'huy,  sans  y  adiouster  ne  diminuer  rien  qui  soit.  Ici  il  monstre  le  remede  pour  nous  preserver  de  tous  les  scandales,  et  de  toutes  les  embusches  de  Satan,  de  tous  ses  filets,  et  de  toutes  les  occasions  qui  nous  sont  dressees  pour  nous  desbaucher  du  chemin  de  salut:  c'est  qu'il  nous  suffise  d'avoir  la  reigle  que  Dieu  nous  donne,  et  que  nous  la  suyvions,  et  qu'elle  nous  adresse  tellement,  que  nous  ayons  les  aureilles  bouchees:  quoy  qu'on  nous  dise,  quoy  qu'on  nous  apporte,  que  tout  cela  soit  reiette,  et  qu'il  n'y  ait  que  Dieu  qui  domine  par  dessus  nous.  Et  ainsi  notons  bien  que  nous  n'aurons  pas  cest  advis  de  nous  garder  des  superstitions,  et  des  abus  de  Satan,  sinon  que  nostre  Seigneur  y  remedie  par  sa  parolle.  Il  est  vray  que  nous  devons  bien  escouter  les  admonitions  qu'on  nous  fait,  et  ne  point  ensuyvre  les  follies,  et  les  erreurs  du  monde,  de  ne  nous  point  envelopper  en  tant  de  phantasies:  et  brief  de  fuyr  toutes  les  folles  devotions  que  les  hommes  se  bastissent  en  leur  teste.  Nous  devons  bien  escouter  cela:  mais  ce  n'est  point  assez.  Car  il  n'y  a  celuy  de  nous  qui  n'ait  une  boutique  de  beaucoup  d'erreurs  en  sa  teste:  encores  que  nous  ne  soyons  point  poussez  par  les  autres,  chacun  s'incitera  tant  et  plus.  Que  faut-il  donc?  Il  n'y  a  autre  moyen  que  de  nous  laisser  gouverner  a  Dieu.  Et  voila  pourquoy  Moyse,  apres  toutes  les  exhortations  qu'il  a  faites,  nous  monstre  que  si  nous  ne  suyvons  la  pure  parolle  de  Dieu,  nous  serons  tousiours  enveloppez  en  beaucoup  de  mauvaises  phantasies:  que  le  diable  trouvera  ouverture,  et  comme  une  bresche  pour  nous  gagner.  Si  donc  nous  voulons  repousser  Satan,  si  nous  voulons  estre  conservez  impollus  de  toutes  superstitions:  que  la  parolle  de  Dieu  ait  son  authorite  envers  nous.  Or  Moyse  dit  en  premier  lieu:  Fay  tout  ce  qui  te  sera  commande.  En  quoy  il  signifie  (comme  nous  avons  touche  en  d'autres  passages)  que  ce  n'est  point  assez  d'obeyr  a  Dieu  a  demi:  car  il  ne  pourra  souffrir  un  tel  partage:  il  faut  qu'en  tout  et  par  tout  il  nous  range  a  ses  commandemens,  et  qu'il  n'y  ait  point  de  replique.  Et  ceci  est  bien  notable.  Car  la  plus  part  confesseront  assez  que  c'est  raison  qu'on  serve  Dieu,  voire  selon  sa  volonte,  comme  il  demande:  mais  elle  ne  laisse  pas  de  tousiours  avoir  des  repliques,  pour  dire:  Et  ceci  ne  me  plaist  point,  telle  chose  seroit  meilleure:  brief  quand  ils  ont  fait  semblant  d'obeyr  a  Dieu,  encores  qu'en  beaucoup  d'endroits  ils  acquiescent  a  ce  qui  leur  est  dit,  il  leur  semble  qu'il  leur  sera  licite  de  laisser  le  reste.  Or  aucontraire,  Dieu  ne  recoit  point  aucune  exception  :  mais  il  dit,  que  tout  ce  qu'il  ordonne,  qu'on  le  face,  et  que  nous  n'entrions  point