10.1:221  CONSILIA.  a  populo  approbatum  esse,  antequam  in  ministerii  possessionem  mittatur.  Quod  si  quis  se  ipsum  intrudit  alia  via,  ubi  in  ecclesia  ordo  iam  constitutus  est,  legitima  vocatione  destituitur.  Ex  eo  tamen  nego  sequi,  populum  electioni  sui  pastoris  praeesse  debere,  Testatur  scriptura,  institutos  fuisse  per  oppida  ac  vicos  ab  apostolis  pastores  cum  populi  consensu  (Act.  14,  24).  Sed  illinc  constat  praefuisse  ipsos  sua  prudentia  et  autoritate  tanto  negotio,  ut  populum  regendo  omnia  decenter  fierent  et  absque  tumultu.  Viguit  porro  eadem  politia  in  ecclesia  christiana,  quamdiu  ordini  ac  disciplinae  locus  remansit.  Quare  si  hoc  ius  vobis  adrogatis,  ut  pro  arbitrio  asciscatis  vobis  pastores,  hoc  nihil  aliud  est  quam  ordinem  a  Deo  positum  cum  honestate  christiana  convellere.  Accedit  alterum  malum,  quod  temerariae  illae  mutationes,  et  perpetuae  novationes,  non  possunt  non  certissimum  periculum  et  pessimam  caudam  secum  trahere:  ac  vitium  illud  plane  damnandum  est.  Scio  natura  hoc  quaeri,  quia  placeat:  sed  tanto  consultius  est  illum  nativum  pruritum  semel  exstinctum  esse.  Hoc  vero  quum  in  vita  humana  perpetuum  usum  habeat,  tum  in  primis  ea  in  re  qua  de  agitur.  Fit  enim  Satanae  artificio,  ut  de  die  in  diem  huius  et  illius  pastoris  taedium  nos  corripiat,  ut  tandem  sapor  et  gustus  verbi  Dei  in  nobis  evanescat:  quumque  appetitu  incerto  et  immoderato  feremur,  nihil  quod  rectum  sit  et  salutare  amplius  admittamus.  Iam  ut  non  defuerit  vobis  ratio  quaedam  et  apparentia,  ut  vocant;  tamen  non  desinit  vitiosus  esse  agendi  modus.  Quae  tamen  ratio  subesse  potuit?  Quum  unus  ex  vestris  ad  certas  ecclesias  visitandas  profectus  esset,  alter  illius  loco  submissus  est  cum  vestro  iudicio  et  approbatione:  ignotus  vobis  esse  non  poterat  qui  iam  multo  ante  concionatus  fuerat  apud  vos.  Neque  coniecturis  actum  fuit,  quum  et  de  doctrina  et  de  vita  constaret.  Si  quis  illum  despicit,  arrogantiam  cum  superbia  in  Deum  prodit.  Quid  igitur  sibi  hoc  vult,  quum  idem  ille  et  legitime  electus,  et  fideliter  defunctus  pastoris  inter  vos  munere,  uti  etiam  apposita  ad  eam  rem  Dei  dona  in  ipso  exstant,  iam  vero  minus  vobis  adlubescat?  Quem  vero  illi  praefertis?  hominem  incognitum.  Quis  vero  superest  a  temeritate  apertissima  vos  nunc  purgandi  locus?  Kegeritis  scilicet,  istum  multo  ornatius  dicere.  Sic  nempe  meministis  illius  Pauli  sententiae:  Quod  regnum  Dei  non  sit  in  sermone,  sed  in  virtute  (1.  Cor.  4,  20)?  Proinde  ut  ipse  alibi  confirmat,  ille  unus  in  pretio  nobis  sit,  qui  est  in  Christo  nova  creatura  (2.  Cor.  5,  17):  neque  haereamus  in  carne  et  apparentia  illa  externa,  quae  nobis  oculos  hebetet,  ne  sincere,  ut  par  est,  iudicare  possimus.  Cavendum,  inquam,  a  larvis,  id  est,  ab  omni  eo  quod  extra  sese  ostentat,  ubi  ut  plurimum  fucus  latet:  sed  ad  id  quod  praecipuum  et  verum  est  intendamus,