1:221  [CO  1.  221]  texunt,  ac  si  ecclesiae  libertatem  suo  decreto  infringere  coepissent.  Tametsi  non  omnia  diximus,  quae  huc  adferri  poterant,  et  ea  quoque  ipsa  quae  diximus  paucissimis  perstricta  sunt,  sic  tamen  debellatum  esse  confido,  ut  nihil  iam  sit  cur  quisquam  ambigat,  spiritualem  potestatem,  qua  papa  cum  toto  suo  regno  superbit,  impiam  esse  contra  Dei  verbum  ac  iniustam  in  Dei  populum  tyrannidem.  Ac  spiritualis  quidem  potestatis  nomine  complectimur  et  audaciam  quam  usurparunt  in  serendis  novis  doctrinis,  quibus  miseram  plebem  a  germana  simplicique  verbi  Dei  puritate  prorsus  avertunt,  et  in  ferendis  novis  legibus  licentiam,  quibus  infelices  conscientias  crudeliter  vexarunt,  et  totam  denique  ecclesiasticam,  ut  vocant,  iurisdictionem,  quam  per  suffraganeos  et  officiales  exercent.  Nam  si  Christum  inter  nos  regnare  permittimus,  totum  istud  dominationis  genus  evertitur  facile  ac  prosternitur.  Alterum  dominationis  genus,  quod  possessionibus  et  latifundiis  continetur,  quia  in  conscientias  non  exercetur,  tractare  praesentis  negotii  non  est.  Qua  tamen  etiam  in  parte  animadvertere  operae  pretium  est,  sui  semper  esse  similes,  nihil  scilicet  minus,  quam  quod  appellari  volunt,  ecclesiae  pastores.  [OS  251]  Nec  peculiaria [p. 455]  hominum  vitia,  sed  commune  totius  ordinis  scelus,  adeoque  ipsam  ordinis  pestem  arguo,  quando  mutilus  illis  fore  creditur,  nisi  opulentia  et  superbis-titulis  spectabilis  fuerit.  An  vero  iudiciorum  cognitionibus,  civitatumque  et  provinciarum  administrationibus  sese  involvere,  et  occupationes  a  se  alienas  latissime  amplecti,  id  episcoporum  erat,  quibus  tantum  in  suo  munere  operae  ac  negotii  est,  ut  si  illic  toti  assiduique  sint,  nec  ullis  avocamentis  distrahantur,  vix  tamen  sufficere  queant?  An  in  satellitii  numero,  aedium  splendore,  vestitus  et  epularum  deliciis,  principum  lautitias  aemulari  eos  decebat,  quorum  vitam  oportuerat  singulare  frugalitatis,  modestiae,  continentiae,  humilitatis  esse  exemplar?  Quantum  et  ab  eorum  officio  abhorrebat,  quos  aeternum  inviolabileque  Dei  edictum  (1  Tim.  3)  turpis  lucri  appetentes,  avarosque  esse  vetat,  et  simplici  victu  contentos  esse  iubet,  non  modo  vicis  et  arcibus  manum  iniicere,  sed  in  amplissimas  quoque  satrapias  involare,  demum  imperia  ipsa  occupare?  Verum,  quando  usque  eo  praefracti  sunt,  ut  tergiversari  etiamnum  ausint  et  iactare,  ecclesiae  dignitatem  non  indecenter  hac  magnificentia  sustineri,  nec  se  interim  a  suae  vocationis  munere  nimium  abstrahi.  Quantum  ad  prius  illud [p. 456]  attinet  si  hoc  decorum  est  suae  dignitatis  ornamentum,  eo  fastigii  evectos  esse,  ut  summis  quibusque  monarchis  sint  formidabiles,  est  cur  cum  Christo  expostulent,  a  quo  sunt  graviter  eo  modo  inhonorati.  Quid  enim  contumeliosius,  eorum  quidem  opinione,  dici  poterat  istis  verbis:  reges  gentium  et  principes  dominantur