50:220  custodiam,  quae  eos  a  maledictione  protegeret.  Quare  legis  custodiam  spiritu  vere  liberalem  fuisse  indicat.  Fides  autem  tunc  nondum  erat  revelata:  non  quia  carerent  patres  omni  luce,  sed  quia  minus  haberent  lucis  quam  nos.  Nam  quum  illic  caeremoniae  Christum  adumbrarent  tanquam  absentem,  nobis  hodie  veluti  coram  repraesentatur.  Sic  pro  speculo  quod  illi  habebant,  nos  substantiam  hodie  habemus.  Qualiscunque  ergo  fuerit  obscuritas  in  lege:  non  tamen  ignorarunt  patres  qua  via  ambulandum  esset.  Nam  etsi  sub  auroram  non  tantus  est  fulgor,  quantus  circa  meridiem:  non  tamen  exspectant  viatores  plenum  solis  exortum,  quia  illis  sufficit  tenere  iter.  Ita  illis  sua  lucis  portio  instar  aurorae  fuit,  quae  illos  ab  omni  erroris  periculo  tutos  ad  aeternam  beatitudinem  ducere  potuit.  24.  Itaque  lex  paedagogus.  Secunda  similitudo,  quae  mentem  Pauli  clarius  etiamnum  exprimit.  Nam  et  paedagogus  non  constituitur  in  totam  vitam:  sed  pueritiae  tantum  destinatur:  quemadmodum  patet  ex  etymo  nominis.  Deinde  puerum  formando,  hoc  spectat,  ut  rudimentis  puerilibus  ad  maiora  praeparetur.  Utrumque  legi  convenit:  nam  aetatem  habuit  finitam  cui  praeesset:  deinde  promovere  debuit  suos  discipulos  aliquousque  duntaxat,  ut  superatis  eius  elementis  dignos  virili  aetate  progressus  facerent.  Ideo  dicit  in  Christum.  Quemadmodum  enim  grammaticus  puerum  sua  cura  formatum  tradit  in  eius  manum,  qui  altioribus  disciplinis  ipsum  perpoliat  :  ita  lex  fuit  quasi  grammatica,  quae  discipulos  ab  se  inchoatos  fidei  percifiendos  tanquam  theologiae  resignaret.  Hoc  modo  pueris  confert  Iudaeos  Paulus,  nobis  adulescentiam  attribuit.  Sed  quaeritur  qualis  fuerit  vel  doctrina,  vel  disciplina  huius  paedagogiae.  Primum  lex,  manifestando  Dei  iustitiam,  illos  propriae  iniustitiae  coarguebat.  Nam  in  praeceptis  Dei,  tanquam  in  speculo,  intueri  poterant  quam  procul  abessent  a  vera  iustitia.  Ita  admonebantur  quaerendam  alibi  esse  iustitiam.  Idem  officii  habebant  promissiones  legales.  Nam  debebant  ita  cogitare:  Si  aliter  vitam  operibus  consequi  non  potes  quam  legem  implendo,  tibi  nova  alia  ratio  quaerenda  est.  Nunquam  enim  patietur  tua  infirmitas  eo  te  conscendere:  etiam  ut  maxime  cupias  ac  nitaris,  semper  tamen  longe  distabis  a  scopo.  Exadverso  urgebant  eos  minae  ac  sollicitabant  ut  effugium  quaererent  irae  ac  maledictionis  Dei.  Imo  non  sinebant  ipsos  quiescere,  donec  stimulasset  ad  expetendam  Christi  gratiam.  Eodem  tendebant  omnes  caeremoniae.  Quorsum  enim  sacrificia  et  ablutiones,  nisi  ut  in  assidua  sordium  et  damnationis  meditatione  exercerentur?  Iam  vero  qui  suam  immunditiem  cernit  ante  oculos,  cui  mortis  suae  imago  in  animali  innoxio  proponitur:  is  quomodo  securus  dormiet?  quomodo  non  movebitur,  ut  ad