29:220  passer  pour  iuste  cause:  car  nous  avons  bien  occasion  de  pleurer,  pource  que  la  mort  nous  est  comme  un  miroir  et  tesmoignage  de  la  malediction  de  Dieu  :  non  pas  sur  un  ou  sur  deux,  mais  sur  tout  le  genre  humain.  Quand  nous  verrons  quelqu'un  trespasses  Dieu  nous  monstre  a  veue  d'oeil  que  nous  sommes  tous  maudits  de  luy,  et  qu'a  cause  du  peche  d'Adam  nous  sommes  tous  enclos  en  ceste  malediction.  Car  la  mort  d'ou  procede-elle,  sinon  d'autant  que  nous  sommes  alienez  de  la  source  et  de  la  fontaine  de  vie?  Dieu  donc  nous  donne  bien  occasion  de  pleurer,  quand  quelqu'un  trespasse  :  mais  cela  se  doit  faire  a  cause  de  nos  pechez:  que  nous  sentions  ce  que  nous  avons  merite,  que  nous  soyons  confus,  que  la  crainte  de  la  vengeance  de  Dieu  nous  touche,  que  nous  en  soyons  tellement  navrez,  que  cela  nous  incite  a  mener  dueil.  Or  ceste  fin  est  bien  mal  gardee  quasi  par  tout  le  monde.  Car  quand  on  pleure,  on  ne  sait  pourquoy:  et  a  grand'  peine  en  trouvera-on  de  cent  l'un  qui  soit  esmeu  et  incite  a  recognoistre-la  punition  du  peche,  et  ceste  malediction  de  Dieu  qui  est  estendue  sur  tous  les  fils  d'Adam.  Voila  donc  ce  que  nous  avons  a  retenir  en  premier  lieu.  Il  y  a  une  autre  fin  seconde,  c'est  assavoir,  quand  Dieu  retire  quelqu'un  qui  pouvoit  servir  a  son  Eglise  en  public  ou  bien  en  prive,  nous  en  devons  estre  marris,  veu  que  nostre  Seigneur  nous  chastie.  S'il  y  a  quelque  bon  Pasteur,  quelque  bon  Prince,  ou  bon  Magistrat,  un  homme  de  conseil,  un  autre  qui  est  pour  servir  a  tout  le  commun,  et  que  Dieu  l'oste:  nous  en  devons  estre  contristez:  et  non  sans  cause:  car  c'est  un  signe  qu'il  veut  diminuer  sa  grace  en  nous.  Or  en  sentant  l'ire  de  Dieu,  n'en  devons-nous  point  estre  touchez?  De  l'autre  coste  nous  voyons  ce  qui  est  dit,  que  nostre  Seigneur  retire  les  iustes,  quand  il  y  a  quelque  vengeance  appareillee:  qu'il  appelle  les  siens  a  repos,  afin  qu'ils  soyent  exemptez  du  mal  qui  est  prochain.  Ce  sont  donc  tousiours  des  menaces  que  Dieu  fait,  quand  il  retire  des  hommes  excellens  d'avec  nous.  Car  c'est  autant  comme  s'il  nous  declaroit  que  nous  ne  sommes  pas  dignes  qu'il  habite  en  nostre  compagnie,  comme  il  en  est  parle  en  l'Epistre  aux  Heb.  que  le  monde  n'estoit  pas  digne  d'avoir  ceux  qui  ont  servi  a  Dieu  avec  une  telle  vertu.  Il  est  vray  qu'on  les  deteste,  qu'on  les  reiette,  comme  s'il  ne  valloyent  pas  que  la  terre  les  soustint:  mais  tant  y  a  que  Dieu  a  l'opposite  declare  que  nous  devons  estre  privez  de  la  compagnie  des  bons,  et  de  ceux  qu'il  a  reservez  a  soy.  Quand  donc  nous  pleurerons  au  trespas  des  gens  de  bien,  qui  ont  chemine  en  la  crainte  de  Dieu,  qui  ont  este  parez  de  vertus  et  graces  excellentes,  qui  ont  servi  pour  edifier  l'Eglise,  et  qui  pouvoyent  encores  continuer  a  ce  faire:  voila  un  pleur  qui  sera  bien  reigle.  Mais  cependant  il  nous