27:220  (car  voila  les  hommes  qui  ont  deifie  une  creature  qui  n'a  iamais  este  au  monde)  ou  bien  qui  s'en  iront  devant  saincte  Katherine,  ou  S.  Christofle  qui  sont  choses  semblables  ^  qu'ils  s'en  iront  dire  la  neuf  fois  pater  noster  et  Ave  maria  :  a  qui  parlentils?  N'est-ce  point  se  mocquer  pleinement  de  Dieu,  voire  le  blasphemer  trop  villainement  ?  Ainsi  les  Payens  ont  eu  beaucoup  plus  de  couleur  que  les  Papistes,  pour  colorer  leurs  abominations,  quand  ils  font  des  choses  si  enormes  que  c'est  pitie,  et  qu'ils  pensent  plaire  a  Dieu  en  tout  cela.  Quand  ils  se  seront  bien  enyvrez  en  un  iour  de  feste,  il  leur  semble  que  Dieu  s'en  contente:  quand  ils  seront  bien  parez,  il  leur  semble  que  c'est  bon  service  de  Dieu  :  brief,  ce  sont  des  sottises  et  badinages  qui  meritent  qu'on  crache  a  l'encontre  toutes  fois  et  quantes  qu'on  en  oit  parler.  Et  ceux  qui  ont  une  goutte  de  bon  sens  peuvent  cognoistre  l'absurdite  qui  y  est  :  mesmes  que  quand  nous  y  pensons,  il  nous  semble  que  ce  soit  une  chose  impossible,  que  les  hommes  ayent  peu  estre  tant  abrutis  comme  on  les  voit.  Mais  c'est  Dieu  qui  a  execute  ceste  menace  qu'il  fait  par  ses  Prophetes:  Qu'il  espandra  un  esprit  de  forcenerie,  et  de  stupidite  sur  le  monde,  qu'il  sera  aveugle:  d'autant  que  ceux  qui  ont  laisse  la  pure  doctrine  de  Dieu,  et  qui  se  sont  divertis  de  l'Escriture  saincte,  sont  dignes  d'estre  tellement  transportez,  qu'ils  commettent  des  choses  si  enormes  que  nous  en  devons  avoir  honte,  et  que  nous  les  devons  tenir  pour  execrables.  Et  cela  nous  est  remonstre,  afin  que  nous  apprenions  de  nous  separer  d'avec  eux:  comme  aussi  c'est  l'intention  de  Moyse,  quand  il  dit  :  Regardez  qu'il  leur  est  advenu.  Ainsi  donc  craignons  que  Dieu  ne  nous  punisse  en  telle  sorte,  c'est  qu'il  nous  mette  en  esprit  reprouve.  Et  pourtant  recevons  la  clarte  de  sa  parolle,  et  cependant  qu'il  nous  monstre  le  chemin,  suyvons-le,  et  souffrons  d'estre  du  tout  retenus  sous  luy.  Car  si  nous  voulons  decliner  ne  ca,  ne  la:  il  est  vray  que  du  premier  coup  nous  ne  viendrons  point  en  une  confusion  si  grande  comme  nous  voyons  les  idolatres  :  mais  en  la  fin  si  aurons-nous  un  mauvais  salaire.  Car  pourquoy  est-ce  qu'ils  ont  este  ainsi  abrutis?  N'y  avoit-il  ne  sens  ne  raison  en  eux?  Or  Dieu  les  a  punis,  d'autant  qu'ils  ne  se  sont  point  assuiettis  a  sa  parolle.  Craignons  donc  une  telle  condamnation:  car  il  est  certain  qu'elle  tombera  sur  nos  testes,  si  nous  les  ensuyvons.  Et  nous  oyons  ce  que  dit  sainct  Paul  en  general  de  tous  ceux  qui  ne  veulent  point  obeyr  a  la  volonte  de  Dieu,  qu'il  faut  qu'ils  ayent  les  yeux  crevez,  qu'ils  ne  discernent  plus,  qu'on  les  traine  par  tout  ou  on  voudra.  Voila  une  menace  qui  s'adresse  a  nous.  Et  ainsi,  que  nous  facions  bon  guet,  et  que  nous  ad  visions  bien  de  ne  point  marcher  un  pas,  que  nous  ne  soyons  reiglez  par  la  parolle  de  Dieu  :  car