20:220  peu  de  l'Evangile  que  pas  un  de  ses  subiects  ne  luy  faisoyent  requeste  pour  lavancement  d'iceluy.  Ie  luy  dis  que  si  elle  vouloit  ie  luy  en  ferois  faire  requeste  a  toutes  les  Eglises.  Mais  sa  responce  fut  maigre  en  cest  endroict.  Cependant  ie  fais  par  dessous  terre  soliciter  les  Eglises  de  faire  des  requestes,  signees  des  magistrats  qui  estoyent  de  l'Eglise,  a  ce  que  la  papaute  fust  abolie,  et  encores  les  Eglises  en  font  tous  les  iours.  Et  quant  a  moy  ie  ne  faillois  pas  a  soliciter  et  la  roine  et  ses  conseillers,  avec  protestations  que  si  l'Evangile  n'estoit  avance  en  ce  pays  qu'il  ne  tenoit  pas  a  moy,  et  ne  cachois  pas  que  ie  le  declarerois  quand  il  seroit  de  besoin.  Vous  en  attendos  l'issue?  Les  unes  ont  obtenu  quelques  temples  repurges  des  idoles,  les  autres  ont  obtenu  que  toute  l'idolatrie  de  papaute  en  fust  abolie,  de  sorte  qu'il  reste  bien  peu  de  villes  en  ce  pays  qui  ayent  la  papaute,  ou  elle  ne  soit  pour  la  pluspart  abolie,  voire  mesmes  les  principales  bourgades  et  beaucoup  de  villages  ont  este  repurges  de  la  papaute,  et  cela  a  este  fait  avec  telle  diversite  que  les  plus  grandes  Eglises  ont  souvent  obtenu  le  moins  et  les  moindres  le  plus,  tellement  que  ces  beaux  conseillers  se  rendent  ridicules  a  tout  le  monde,  et  si  ne  me  scauroyent  faire  plus  grand  honneur,  d'autant  qu'on  scait  que  ie  ne  m'en  mesle  plus,  comme  ie  confesse  que  ie  ne  le  cache  pas.  Cecy  m'avoit  fait  concevoir  quelque  petite  esperance  parce  qu'il  est  impossible  de  racoustrer  cela  sans  abbattre  toute  la  papaute.  Mais  elle  m'a  mis  une  difficulte,  a  savoir  qu'elle  ne  pensoit  pas  que  vous,  ny  Mr.  de  Bese,  ny  l'Eglise  de  Geneve  fust  de  mon  avis  pour  abbattre  toute  la  papaute  en  ce  pays,  vu  les  conditions  des  personnes  d'iceluy.  Oar  quant  aux  autres  ministres  de  ce  pays  elle  pense  qu'ils  sont  tous  guagnes  par  moy.  Elle  dit  que  ce  peuple  est  non  seulement  rude  mais  adversaire  de  l'Evangile,  et  que  si  on  leur  oste  toute  la  papaute,  on  les  laissera  sans  religion,  encores  qu'on  leur  face  prescher  l'Evangile,  a  cause  qu'ils  ne  le  voudront  pas  escouter  ny  recevoir.  Il  est  vray  qu'il  y  a  une  grande  rudesse  et  qu'en  beaucoup  de  lieux  peu  le  recoyvent.  Combien  que  ie  le  puis  comparer  a  ceux  du  pays  de  Savoye  vos  circonvoysins,  en  ce  faict  neantmoins  il  y  a  deux  differences:  L'une  qu'ils  sont  les  plus  obeissans  qu'il  est  possible,  l'autre  qu'ils  ne  sont  pas  tant  ennemis  de  l'Evangile,  et  qu'il  y  a  plusieurs  cartiers  ou  il  prospere  fort  bien.  Vous  pouves  aisement  voir  qu'il  ne  m'est  pas  difficile  de  repousser  tout  cela:  et  ie  luy  remonstre  les  moyens  les  plus  doux  pour  y  proceder  qu'il  est  possible.  Ie  ne  vous  reciteray  pas  au  long  cela,  d'autant  que  ie  serois  trop  long,  et  il  ne  vous  est  pas  mal  aise  de  le  scavoir,  voire  beaucoup  d'autres  qui  me  sont  incognus.  Or  elle  vous  en  veut