1:220  [CO  1.  220]  postea  aliquod  consentit  imponi.  Imponitur  autem,  si  sua  autoritate  decernunt  apostoli,  prohibendum  gentibus,  ne  idolothyta,  sanguinem  et  suffocatum  attingant.  Manet  quidem  adhuc  scrupulus,  quod  nihilominus  videantur  prohibere.  Atqui  facile  dissolvetur,  si  quis  propius [p. 452]  decreti  ipsius  sensum  animadvertat;  cuius  primum  ordine  et  momento  praecipuum  caput  est:  relinquendam  esse  gentibus  suam  libertatem,  nec  illis  obturbandum  esse,  aut  de  legis  observationibus  exhibendam  molestiam.  Hactenus  nobis  egregie  patrocinatur.  Quae  autem  proxime  sequitur  exceptio  nec  nova  lex  est  ab  apostolis  lata,  sed  divinum  aeternumque  mandatum,  de  servanda  caritate;  nec  punctum  ex  illa  libertate  delibat,  sed  gentes  duntaxat  admonet,  qua  ratione  sese  fratribus  attemperent,  ne  sua  libertate  in  eorum  offensionem  abutantur.  Sit  hoc  igitur  secundum  caput:  ut  innoxia  libertate  utantur  gentes  ac  citra  fratrum  offensionem.  At  certum  tamen  aliquid  praescribunt:  nempe  quatenus  pro  tempore  expediebat,  docent  ac  designant,  quibus  rebus  in  fratrum  offensionem  possint  incurrere,  quo  ab  illis  caveant;  nihil  tamen  novum  ad  aeternam  Dei  legem,  quae  fratrum  offensionem  prohibet,  de  suo  afferunt.  Quemadmodum  si  qui  nondum  bene  constitutis  ecclesiis  praesunt,  fideles  pastores,  omnibus  suis  nunc  edicant:  ne  donec  imbecilli,  quibuscum  vivunt,  adolescant,  [OS  250]  palam  carnibus  die  veneris  vescantur,  aut  feriis  in  publico  laborent,  aut  simile  quidpiam.  Haec  enim,  tametsi  seposita  superstitione  indifferentia  per [p. 453]  se  sunt,  ubi  tamen  accedit  fratrum  offensio,  sine  delicto  admitti  nequeunt.  Sic  autem  sunt  tempora,  ut  spectaculum  hoc  proponere  infirmis  fratribus  non  possint  fideles,  quin  eorum  conscientias  gravissime  vulnerent.  Quis  nisi  calumniator,  sic  novam  ferri  ab  his  legem  dicat,  quos  constat  duntaxat  scandalis  occurrere,  quae  sunt  a  Domino  satis  diserte  prohibita?  Nihilo  autem  magis  et  de  apostolis  dici  potest,  quibus  nihil  aliud  propositum  erat,  offensionum  materiam  tollendo,  quam  divinam  urgere  legem,  de  vitanda  offensione,  ac  si  dixissent:  praeceptum  Domini  est,  ne  fratrem  infirmum  laedatis;  quae  idolis  oblata  sunt,  suffocatum  et  sanguinem  manducare  non  potestis,  quin  offendantur  infirmi  fratres.  Edicimus  igitur  vobis  in  verbo  Domini,  ne  cum  scandalo  manducetis.  Idque  ipsum  spectasse  apostolos,  Paulus  optimus  est  testis,  qui  certe  non  nisi  ex  concilii  sententia,  sic  scribit  (1  Cor.  8):  de  escis  quae  idolis  immolantur  scimus,  quia  simulacrum  nullum  est  in  mundo.  Quidam  autem  cum  conscientia  idoli,  quasi  idolis  immolatum,  manducant  et  conscientia  eorum  infirma  polluitur:  videte  ne  facultas  ista  vestra  offendiculum  fiat  infirmis.  Cui  istaec  probe  perpensa  fuerint,  ei  posthac  fucus  non  fiet,  qualem  faciunt,  qui  suae  tyrannidi  apostolos [p. 454]  prae-