46:22  main,  d'autant  qu'il  nous  a  adoptez,  et  qu'il  ne  nous  veut  point  traitter  comme  serviteurs  qu'on  aura  a  louage,  mais  qu'il  nous  supporte  par  sa  misericorde.  Voyla  donc  comme  il  nous  faut  appliquer  a  nostre  usage  et  instruction  ce  qui  est  yci  dit  de  la  personne  de  Zacharie  et  d'Elizabeth.  Or  venons  au  recit  que  fait  S.  Luc,  que  son  tour  estant  venu  de  faire  le  perfum,,  il  estoit  au  Temple,  et  le  peuple  estoit  dehors.  Car  nous  scavons  que  cela  avoit  este  institue  en  la  Loy,  qu'il  faloit  que  le  Sacrificateur  entrast  au  Sanctuaire  au  nom  de  tous:  pource  qu'il  a  falu  que  ce  qui  a  este  manifeste  en  pleine  verite,  et  en  substance  en  nostre  Seigneur  Iesus  Christ  a  sa  venue,  fust  alors  figure  en  ombrages.  Or  scavons-nous  que  nostre  Seigneur  Iesus  est  apparu  au  monde,  afin  de  nous  declarer  qu'il  est  nostre  frere,  et  cependant  il  est  venu  aussi  au  nom  de  Sacrificateur:  et  la  dignite  et  l'office  de  ceste  charge  est,  d'approcher  de  Dieu,  et  de  parler  en  nostre  nom,  tellement  que  par  son  moyen  nous  ayons  aussi  accez  a  nostre  Dieu,  duquel  autrement  nous  serions  bien  esloignez.  Or  regardons  ce  qui  a  este  institue  en  la  Loy  quant  aux  Sacrificateurs.  Il  estoit  dit,  que  le  Sacrificateur  quand  il  feroit  son  office  au  temple,  seroit  revestu  d'accoustremens  sacrez,  et  que  mesmes  le  grand  Sacrificateur  porteroit  sur  sa  teste,  Sainctete  de  Dieu,  pour  monstrer  qu'il  estoit  comme  separe  du  rang  des  hommes.  Non  pas  que  telle  perfection  peust  estre  en  ceux  qui  pour  lors  estoyent  en  cest  estat:  mais  cela  (comme  i'ay  dit)  emportoit  la  figure  de  nostre  Seigneur  Iesus  Christ.  En  somme,  combien  que  les  Sacrificateurs  priassent  pour  obtenir  pardon  de  leurs  pechez,  tant  y  a  qu'ils  estoyent  revestus  d'accoustremens  sacrez,  pour  monstrer  que  Dieu  ne  les  tenoit  plus  du  rang  des  hommes  mortels.  Et  cela  estoit  pour  signifier  aux  Iuifs,  combien  que  Dieu  les  eust  dediez  a  soy,  que  neantmoins  ils  estoyent  tenus  profanes  et  pollus,  et  n'estoyent  pas  dignes  d'entrer  au  Temple,  et  qu'il  n'y  avoit  qu'un  seul  Sacrificateur.  Or  cependant,  a  fin  que  tout  le  peuple  ne  fust  point  fasche,  comme  si  Dieu  le  reiettoit  a  cause  de  son  indignite,  le  Sacrificateur  portoit  devant  sa  poictrine  les  noms  du  peuple:  c'estoit  a  dire,  il  portoit  douze  pierres  precieuses,  qui  estoyent  pour  signifier  les  douze  lignees  d'Israel,  comme  s'il  les  portoit  en  son  coeur.  Dieu  donc  monstroit��  combien  que  le  peuple  fust  recule  de  son  Temple,  neantmoins  qu'il  ne  laissoit  pas  en  la  personne  du  Sacrificateur  de  les  tenir  pour  siens.  Il  y  a  d'avantage  deux  pierres  sur  les  espaules  du  Sacrificateur,  la  ou  les  noms  de  ces  douze  lignees  estoyent  aussi  bien  escrits.  Voyla  donc  le  grand  Sacrificateur  qui  porte  sur  ses  espaules  en  figure  ce  que  nostre  Seigneur  Iesus  Christ  a  accompli  en  verite,  et  sur  son  esto-