44:22  tatis  cumulus  a  propheta,  quum  dicit  homines  delitiis  ebrios  spoliare  Deum  iudicis  officio,  ut  neque  bene  faciat  neque  male.  Est  autem  probabile  tunc  multos  fuisse  Ierosolymae,  et  in  tota  Iudaea,  qui  ita  contumaciter  spernebant  Dei  iudicium.  Sed  praecipue  stylum  Sophonias  adversus  optimates  stringit  :  quia  tales  prae  aliis  gigantum  instar  Deum  subsannant,  et  quasi  despiciunt  e  sublimi  iudicia  ipsius.  Est  quidem  in  ipso  vulgo  multum  socordiae:  sed  plus  amentiae  est  in  superbia  procerum,  qui  confisi  sua  potentia  non  putant  se  obnoxios  esse  Dei  imperio.  Caeterum,  quod  nuper  dixi  memoria  tenendum  est,  describi  a  propheta  quasi  insanabile  vitium,  ubi  Iudaeos  accusat  quod  non  existiment  Deum  vel  boni  vel  mali  esse  autorem.  Deus  enim  hoc  modo  e  suo  gradu  deiicitur:  quia  nisi  agnoscitur  Iudex  mundi,  qualis  erit  eius  divinitas?  Neque  enim  maiestas  Dei,  vel  imperium,  vel  gloria  consistit  in  aliquo  imaginario  fulgore:  sed  in  officiis,  quae  sic  in  ipsum  proprie  competunt,  ut  non  possint  ab  eius  essentia  avelli.  Proprium  Dei  est  mundum  regere,  proprium  eius  est  curam  gerere  humani  generis,  deinde  discernere  inter  bonum  et  malum,  miseris  opem  ferre,  ulcisci  omnia  scelera,  compescere  iniustam  violentiam.  Haec  si  quis  a  Deo  auferre  velit,  relinquet  duntaxat  idolum.  Quoniam  ergo  gloria  Dei  in  iustitia,  sapientia,  iudicio,  potentia  et  aliis  virtutibus  consistit,  quicunque  negant  Deum  esse  mundi  iudicem,  exstinguunt  prorsus  eius  gloriam,  quantum  in  se  est.  Ita  etiam  profani  scriptores  Epicuro  exprobrant,  quod  quum  negare  prorsus  non  auderet  esse  aliquem  deum,  sicuti  Diagoras  et  similes,  confessus  fuerit  deos  esse  :  sed  incluserit  ipsos  in  coelo,  ut  illic  fruantur  otio  et  delitiis.  Hoc  vero  est  imaginari  deum,  qui  deus  non  est.  Itaque  mirum  non  est  quod  propheta  tam  severe  damnet  socordiam  hanc  in  Iudaeis,  quod  non  putent  bona  vel  mala  proficisci  a  Deo.  Sed  fuit  etiam  maior  ratio  cur  Deus  tantopere  excandesceret  contra  hunc  stuporem.  Unde  enim  opinio  haec,  vel  delirium  hominibus,  ut  negent  Deum  bene  vel  male  facere,  nisi  quia  conantur  procul  arcere  Deum,  ne  sint  obnoxii  eius  iudicio?  Qui  ergo  volunt  exstinguere  sensum  et  discrimen  boni  et  mali  in  suis  conscientiis,  illi  sibi  fabricant  ista  deliria,  Deum  non  curare  res  humanas,  contentum  esse  sua  felicitate  coelesti,  neque  descendere  usque  ad  nos,  et  fortuito  tam  res  adversas  quam  prosperas  contingere  hominibus.  Videmus  ergo  ut  homines  sponte  vel  de  industria  sibi  accersant  hanc  imaginationem,  bona  et  mala  non  provenire  a  Deo,  ut  obstupefaciant  suas  conscientias,  atque  ita  maiore  licentia  sese  praecipitent  ad  peccandum,  ac  si  impune  quidvis  liceret,  quasi  nullus  esset  iudex  coram  quo  reddenda  sit  ratio.  Atque  ideo  dixi  hunc  esse  sum  mum  impietatis  cumulum,  ubi  scilicet  sese  confir-  2*