42:22  n'avoit  iamais  este  instruit  de  Dieu,  et  nous  avons  un  privilege  grand  et  inestimable  par  dessus  luy,  c'est  que  Dieu  se  presente  pour  estre  nostre  maistre  d'escole,  et  nous  enseigner.  Or  si  nous  ne  le  voulons  escouter  que  nous  adviendra-il?  Il  ne  permettra  pas  que  nous  soions  punis,  ne  de  ses  anges,  ne  par  quelques  creatures  excellentes,  mais  il  faudra  que  nous  soions  mis  en  opprobre,  que  des  vers  de  terre  s'eslevent  contre  nous:  nous  voions  ce  qui  est  advenu  a  Pharao  pour  abaisser  son  orgueil,  que  les  mousches  et  les  autres  vermines  sont  la  pour  luy  crever  les  yeux,  ainsi  est-ce  que  Dieu  besongne  iournellement.  Craignons  donc  telles  especes  de  punitions,  et  mettons  peine  d'apprendre  cependant,  que  Dieu  nous  fait  cet  honneur  de  nous  enseigner  par  sa  bouche,  monstrons  que  nous  sommes  siens,  et  que  nous  cheminons  en  sa  subiection,  nous  laissant  gouverner  par  luy,  que  si  nous  ne  le  faisons,  il  est  certain  qu'il  nous  envoiera  des  maistres  qui  nous  seront  beaucoup  plus  rudes,  et  sur  tout  que  ce  seront  gens  contemptibles  et  infames,  qui  nous  mettront  quant  et  quant  en  infamie  et  opprobre,  selon  que  nous  en  sommes  dignes.  Voila  donc  ce  que  nous  avons  a  noter,  et  ce  n'est  pas  seulement  en  cette  histoire,  que  Dieu  nous  ha  voulu  donner  une  telle  instruction,  mais  nous  voions  le  semblable  communement,  ie  vous  prie,  aucunesfois  attendra-on  ce  que  Dieu  aura  fait,  que  nous  serons  contraints  de  nous  en  esbahir,  mais  cependant  il  y  ha  bien  peu  qui  y  regardent.  Or  de  nostre  coste  nous  avons  tant  moins  d'excuses,  quand  Dieu  nous  advertist,  qu'il  nous  baille  comme  un  mirouer,  auquel  nous  pouvons  contempler  ces  histoires  ici,  de  nostre  temps,  a  fin  de  les  appliquer  a  nostre  usage  et  edification.  Puis  donc  que  Dieu  se  presente  ainsi  a  nous,  regardons,  et  faisons  nostre  profit  de  sa  presence:  voila  done  quant  a  l'histoire  qui  est  ici  recitee.  Or  il  est  puis  apres  parle  d'une  autre  levee  que  feist  Antiochus  apres  la  mort  de  Philopater,  et  est  dit  que  ce  roy  ici  d'Aquilon  amenera  une  armee  plus  forte  que  la  premiere,  et  viendra  (dit-il)  au  pays  d'Epiphanes,  non  pas  Antiochus,  mais  Ptolomee  roy  d'Egypte,  car  il  y  ha  eu  tant  en  Egypte  qu'en  Syrie  des  roys  qui  estoient  nommes  illustres  et  excellents:  or  cettui-ci  donc  fait  une  grosse  assemblee  de  gens  pour  assaillir  son  ennemi,  pensant  bien  en  venir  a  bout,  mais  quand  il  ne  peut  faire  ce  qu'il  ha  entreprins,  alors  il  va  faire  des  alliances,  et  se  conioint  a  Philippes  qui  estoit  pour  lors  roy  de  Macedone,  il  fait  donc  alliance  avec  luy,  car  c'estoit  pour  indigner  les  Romains,  car  Philippes  avoit  de  ce  temps  la  guerre  entre  les  Romains  et  luy,  d'autre  coste,  il  voioit  bien  que  les  Romains  luy  vouloient  faire  barres,  a  fin  de  l'empescher  qu'il  n'approchast  du  royaume  d'Egypte,  lequel  il  pre-