41:22  etiam  apud  profanos  homines  valet.  Quanquam  postea  in  sua  quisque  somnia  delabitur,  tamen  hoc  fatentur  omnes,  non  posse  esse  plures  deos.  Deum  quidem  distrahunt:  sed  non  possunt  negare,  quin  sit  unicus  deus.  Darius  ergo  ubi  hoc  elogium  tribuit  deo  Israelis,  fatetur  alios  omnes  deos  mera  esse  figmenta:  sed  hoc  non  intelligit,  quemadmodum  dixi,  profanos  homines  tenere  quidem  principium  illud,  sed  postea  evanescere  in  suis  cogitationibus.  Hic  ergo  locus  non  evincit,  quemadmodum  videtur  quibusdam,  regem  Darium  fuisse  vere  conversum,  ita  ut  amplexus  fuerit  sinceram  pietatem.  Coluit  enim  semper  sua  idola:  sed  putavit  hoc  sufficere,  si  gradum  supremum  relinqueret  deo  Israelis.  Atqui,  ut  scimus,  Deus  non  potest  admittere  socium,  est  enim  zelotes  suae  gloriae.  Fuit  igitur  hoc  nimis  frigidum,  quod  Darius  agnovit  deum,  quem  colebat  Daniel,  excellere  supra  omnes  deos:  quia  ubi  regnat  Deus,  necesse  est  in  nihilum  redigi  omnia  idola:  quemadmodum  etiam  in  Psalmo  dicitur,  Deus  regnat,  concidant  omnes  dii  gentium.  Non  igitur  eo  usque  profecerat  Darius,  ut  se  addiceret  vero  et  unico  Deo:  sed  coactus  est  dare  summum  honorem  deo  Israelis  :  interea  semper  stetit  demersus  in  suis  superstitionibus,  quibus  assueverat.  Postea  adiungit,  Deus  tuus  quem  colis  iugiter,  potuitne  te  liberare  a  leonibus?  dubitanter  hic  loquitur,  ut  solent  increduli,  qui  videntur  quidem  sibi  sperare,  sed  nihil  habent  stabile  vel  solidum  in  suis  animis.  Invocatio  est  a  natura,  ut  ita  loquar:  hoc  est,  naturaliter  impellit  arcanus  quidam  instinctus  homines,  ut  ad  Deum  confugiant:  sed  quia  vix  centesimus  quisque  innititur  verbo  Dei,  hinc  fit  ut  fortuito  omnes  Deum  invocent.  Volunt  igitur  experiri  an  Deus  iuvare  ipsos  velit,  et  succurrere  eorum  necessitatibus  :  interea,  quemadmodum  dixi,  nulla  est  firma  persuasio  in  cordibus  ipsorum.  Talis  fuit  affectus  regis  Darii:  'Potuitne  Deus  ie  liberare,  inquit?  Quasi  vero  dubitandum  sit  de  potentia  Dei.  Si  dixisset,  An  Deus  te  liberavit?  hoc  erat  tolerabile.  Neque  enim  Deus  obstrictus  est  aliqua  lege,  ut  semper  suos  a  morte  eripiat,  quemadmodum  satis  notum  est:  sed  hoc  positum  est  in  eius  arbitrio.  Quum  ergo  suos  permittit  impiorum  libidini,  non  ideo  imminuitur  eius  potentia,  quia  pendet  ab  eius  mera  voluntate  an  liberet.  Quod  vero  ad  potentiam,  certe  non  debet  vocari  in  dubium.  Videmus  ergo  ut  Darius  nunquam  vere  conversus  fuerit,  nihil  distincte  cognoverit  de  vero  ut  unico  Deo,  sed  correptus  fuerit  caeco  metu,  qui  ipsum  vellet  nollet,  tamen  cogeret  tribuere  Deo  Israelis  summum  honorem.  Atqui  haec  non  fuit  ingenua  confessio,  sed  potius  extorta.  Sequitur  nunc,  21.  Tunc  Daniel  cum  rege  loquutus  est,  Rex,  in  aeternum  vive.  2*