39:22  sexto  capite,  videtur  propheta  magis  notare  catapultas  vel  arietes.  Erant  autem  machinae  ad  muros  diruendos.  Proiiciebantur  enim  magni  lapides,  vel  congeries  lapidum:  et  ideo  libenter  eorum  sententiae  subscribo  qui  vertunt  aut  balistas,  aut  catapuitas,  aut  arietes.  Ecce  ergo  admoti  sunt  arietes  ad  urbem,  inquit,  ad  capiendum  eam,  et  urbs  iam  tradita  est  Chaldaeis.  Erat  decimus  annus  Zedechiae,  sicuti  visum  est:  initio  autem  mensis  undecimi  urbs  tandem  capta  fuit.  Sed  interpres  optimus  erit  propheta  verborum  suorum,  quod  facile  colligitur  ex  contextu.  Dicit  enim  urbem  esse  captam,  a  gladio,  fame,  et  peste:  quasi  diceret,  quamvis  nondum  hostes  ingressi  essent  urbem,  tamen  actum  esse,  neque  quidquam  restare  spei,  quoniam  non  tantum  oppugnaretur  armis  et  violentia,  sed  etiam  haberent  hostes  domesticos,  qui  intus  ipsam  urgebant,  nempe  famem,  et  pestem.  Quoniam  igitur  iam  magnus  numerus  consumptus  erat  peste  et  fame,  propheta  dicit,  etiamsi  hostes  cessent,  neque  vi  perrumpant  in  urbem  ipsam,  tamen  actum  esse,  quia  sic  grassentur  pestis  et  fames,  ut  nulla  sit  spes  salutis.  Denique  his  verbis  ultimam  desperationem  significat:  et  hinc  etiam  illa  cogitatio,  quae  torquebat  animum  prophetae  propter  absurditatis  speciem,  quod  scilicet  Deus  iuberet  agrum  emere,  qui  tamen  iam  sub  hostium  potestatem  transierat.  Addit,  quidquid  loquutus  es  accidit,  vel  contigit.  Et  ecce  tu  vides.  Confirmat  quod  paulo  ante  dixerat,  nempe  cladem  urbis  non  aliunde  profectam  esse  quam  ex  Dei  iudicio.  Confirmat  autem,  quia  quidquid  tunc  acciderat,  iam  in  tempore  prophetae  testati  fuerant.  Hinc  autem  apparuit  non  affligi  urbem  fortuito  casu,  quia  nihil  praedixerat  Deus  per  servos  suos  nisi  quod  ipse  decreverat.  Fuit  igitur  opus  Dei  clades  Ierosolymae,  de  qua  vaticinatus  fuerat  Deus  per  servos  suos.  Haec  enim  simul  coniungi  debent,  os  Dei  et  manus.  Neque  enim  imaginari  fas  est  quod  faciunt  quidam  fanatici,  Deum  speculari  e  coelo  quidquid  in  terra  geritur,  et  interea  iacere  otiosum.  Sed  decernit  quod  rectum  est:  deinde  ubi  ita  expedit,  testatur  per  servos  suos  prophetas.  Quidquid  sit,  os  Dei  non  potest  separari  ab  eius  manu.  Propheta  igitur  ostendit  iustum  esse  iudicium  Dei,  cladem  urbis,  quia  prius  de  ea  loquuti  fuerint  prophetae.  Quod  dicit  Deum  inspicere,  ad  proximum  versum  referri  debet,  vel  ad  versum  proxime  sequentem:  quia  scilicet  haec  inter  se  videntur  pugnare  ut  propheta  agrum  emat  Dei  iussu,  et  interea  Deus  non  ignoret  terram  possideri  ab  hostibus,  et  populum  esse  addictum  exsilio.  Quum  igitur  Deus  statuerit  eiicere  populum  e  terra,  qui  fit  ut  velit  agrum  emi  a  servo  suo?  si  hoc  Deum  latuisset,  non  fuisset  tanta  absurditas  in  repugnantia.  Sed  quum  Deus  satis  intelligat  non  posse  mutari  quod  toties  per  suos  prophetas  promulgaverat  dc  2*