37:22  potentiam  extollens.  Quorsum  id  faciat  prius  attigimus:  quia  scilicet  adeo  propensi  ad  diffidentiam  sumus,  ut  occasione  vel  minima  vacillemus:  ideo  pluribus  inculcare  cogitur  propheta,  ut  infirmos  ac  labascentes  animos  in  fiducia  Dei  contineat.  Ante  quidem  de  mundi  creatione  loquutus  est:  nunc  vero  ad  perpetuam  gubernationem  descendit:  quia  non  uno  tantum  momento  manum  suam  exseruit  Deus  ad  creandum  mundum,  sed  in  eo  conservando  non  minus  efficaciter  eam  profert.  Atque  hoc  notatu  dignum  est:  quia  frigida  speculatio  esset,  Deum  sentire  mundi  autorem,  nisi  ad  tuendum  eius  statum  semper  extenta  esset  eius  manus.  Hoc  intelligit  propheta  sedendi  verbo,  terram  non  manere  suo  loco  stabilem  et  fixam,  nisi  quatenus  sustinetur  Dei  virtute.  Nam  sessio  metaphorice  tantundem  valet  atque  imperium.  Terrae  vero  incolas  locustis  comparans,  admonet  Deum  minime  includi  his  angustiis,  quia  ne  coeli  quidem  ipsum  comprehendunt:  ut  discamus,  quoties  fit  Dei  mentio,  nihil  de  incomprehensibili  eius  gloria  terrestre  vel  humanum  concipere.  Caeterum  docet  haec  similitudo  quam  ridicula  sit  hominum  caecitas  dum  nihil  non  sibi  arrogant:  quia  tantundem  proficiunt  suis  iactantiis,  ac  si  minutae  quaedam  bestiolae,  quales  sunt  locustae,  saltando  se  efferrent.  Atqui  mox  necesse  est  eas  in  terram  recidere.  Expandit  quasi  tentorium.  Eadem  forma  loquendi  utitur  etiam  David  (Psal.  104,  2):  agit  autem  uterque  de  coelorum  aspectu  et  expansione  respectu  nostri.  Nec  enim  intelligunt  Deum  expandere  coelos,  ut  in  iis  habitet,  sed  ut  nobis  potius  detur  sub  iis  habitandi  locus.  Ut  enim  sustinemur  terra,  ita  coelis  contegimur,  quo  sartam  et  tectam  undiquaque  mansionem  habeamus.  Verum  hae  similitudines  multum  extenuare  videntur  dignitatem  rei  de  qua  propheta  concionatur,  quum  tamen  ipsam  pro  viribus  extollere  atque  illustrare  velit.  Quid  enim  cortina?  quid  tentorium?  Respondeo,  has  similitudines  valere  nihilominus  ad  amplificationem  rei.  Perinde  enim  est  ac  si  diceret:  Tam  facile  a  Deo  extendi  coelum,  quam  ab  homine  cortinam.  Et  unicuique  considerandum  relinquit,  quantum  differant  coeli  a  cortina,  et  quanta  sit  eorum  magnitudo.  Nemo  enim  est  cui  hoc  satis  perspicuum  non  sit.  Denique  subest  antithesis  inter  tabernacula,  quae  laboriose  magnis  impensis  et  longo  tempore  exstruunt  homines,  quae  tamen  vix  ad  centum  pedes  assurgunt:  et  immensam  coelorum  altitudinem  solo  Dei  nutu  dispositam,  quae  satis  clare  demonstrat  qualis  et  quantus  sit  artifex.  23.  (Redigit  potentes.)  Pergit  in  celebranda  Dei  providentia,  qua  totus  quidem  orbis,  sed  humanum  genus  specialiter  regitur.  Nuper  attingere  coepit,  Deum  non  ita  mundum  condidisse  ut  postea  for-