31:22  qu'en  aspirant  lentement  et  avec  grande  difficulte  a  tant  de  vertus  qui  ont  este  excellentes  en  luy,  ie  me  sente  encores  entache  des  vices  contraires,  toutesfois  si  i'ay  quelques  choses  de  commun  avec  luy,  ie  suis  content  de  les  considerer,  et  faire  quelque  comparaison  de  l'un  a  l'autre.  Ainsi  donc,  ia  soit  qu'en  lisant  les  tesmoignages  de  sa  foy,  patience,  ardeur,  zele  et  integrite,  ie  me  soye  souventesfois  mis  a  gemir  et  souspirer  que  ie  n'en  approchoye  que  de  bien  loin,  toutesfois  c'a  este  une  chose  qui  m'a  beaucoup  servi,  de  contempler  en  luy,  comme  en  un  miroir,  tant  les  commencemens  de  ma  vocation,  que  le  discours  et  la  continuation  de  ma  charge  :  a  ce  que  ie  recognusse  plus  asseurement  que  tout  ce  qu'a  souffert  et  soustenu  ce  Roy  et  Prophete  tant  excellent,  m'estoit  propose  de  Dieu  pour  exemple  afin  de  l'imiter.  Vray  est  que  ma  condition  est  beaucoup  moindre  et  plus  basse,  et  n'est  pas  besoin  que  ie  m'arreste  a  le  monstrer:  mais  cemme  il  fut  prins  d'apres  les  bestes,  et  esleve  au  souverain  degre  de  dignite  royale,  ainsi  Dieu  de  mes  petis  et  bas  commencemens  m'a  avance  iusqu'a  m'appeler  a  ceste  charge  tant  honorable  de  ministre  et  prescheur  de  l'Evangile.  Des  que  i'estoye  ieune  enfant,  mon  pere  m'avoit  destine  a  la  Theologie:  mais  puis  apres,  d'autant  qu'il  consideroit  que  la  science  des  loix  communement  enrichit  ceux  qui  la  suyvent,  ceste  esperance  luy  feit  incontinent  changer  d'avis.  Ainsi  cela  fut  cause  qu'on  me  retira  de  l'estude  de  Philosophie,  et  que  ie  sus  mis  a  apprendre  les  Loix:  ausquelles  combien  que  ie  m'efforcasse  de  m'employer  fidelement,  pour  obeir  a  mon  pere,  Dieu  toutesfois  par  sa  providence  secrete  me  feit  finalement  tourner  bride  d'un  autre  coste.  Et  premierement,  comme  ainsi  soit  que  ie  fusse  si  obstinement  addonne  aux  superstitions  de  la  Papaute,  qu'il  estoit  bien  mal-aise  qu'on  me  peust  tirer  de  ce  bourbier  si  profond,  par  une  conversion  subite  il  domta  et  rangea  a  docilite  mon  coeur,  lequel,  en  esgard  a  l'aage,  estoit  par  trop  endurci  en  telles  choses.  Ayant  donc  receu  quelque  goust  et  cognoissance  de  la  vraye  piete,  ie  sus  incontinent  enflamme  d'un  si  grand  desir  de  proufiter,  qu'encore  que  ie  ne  quittasse  pas  du  tout  les  autres  estudes,  ie  m'y  employoye  toutesfois  plus  laschement.  Or  ie  sus  tout  esbahi  que  devant  que  l'an  passast,  tous  ceux  qui  avoyent  quelque  desir  de  la  pure  doctrine,  se  rangeoyent  a  moy  pour  apprendre,  combien  que  ie  ne  feisse  quasi  que  commencer  moy-mesme.  De  mon  coste,  d'autant  qu'estant  d'un  naturel  un  peu  sauvage  et  honteux,  i'ay  tousiours  aime  requoy  et  tranquillite,  ie  commencay  a  chercher  quelque  cachete  et  moyen  de  me  retirer  des  gens:  mais  tant  s'en  faut  que  ie  veinsse  a  bout  de  mon  desir,  qu'au  contraire  toutes  retraittes  et  lieux  a  l'escart  m'estoyent