27:22  peuple  fust  enseigne,  que  la  semence  de  la  foy  fust  espandue  et  ca,  et  la.  Car  s'il  y  eust  eu  quelque  region  assignee  aux  Levites,  c'eust  este  pour  abolir  la  memoire  de  Dieu,  et  mettre  sous  le  pied  toute  doctrine  :  mais  d'autant  que  Dieu  avoit  constitue  la  lignee  de  Levi  pour  annoncer  sa  parolle,  pour  porter  le  message  de  salut,  il  ne  luy  a  point  donne  certaine  portion  pour  habiter,  il  vouloit  qu'ils  fussent  dispersez  ca  et  la.  Et  qu'ainsi  soit,  nous  savons  que  dit  le  Prophete,  que  Dieu  avoit  fait  alliance  avec  la  lignee  de  Levi.  Et  comment?  L'alliance  de  paix:  voire  disant:  Les  sacrificateurs  sont  les  Anges,  et  les  messagers  de  Dieu:  on  interroguera  leur  bouche  pour  s'enquerir  de  ma  Loy,  et  ils  enseigneront  science.  Nous  voyons  donc  que  ce  service  dont  il  est  ici  parle,  comprend  la  doctrine,  que  ceux  que  Dieu  avoit  ainsi  choisis  eussent  la  charge  d'annoncer  la  Loy,  et  de  l'exposer  au  peuple,  afin  que  la  religion  demeurast  en  son  integrite.  Or  cela  doit  estre  observe  auiourd'huy  entre  nous.  Car  combien  que  nous  soyons  tous  sacrificateurs  depuis  le  plus  grand  iusques  au  plus  petit:  tant  y  a  que  les  Ministres  de  la  parolle  doivent  enseigner,  monstrer  le  chemin  aux  autres  d'aller  a  Dieu,  de  reduire  les  povres  ames  qui  estoyent  en  train  de  perdition.  Et  voila  pourquoy  S.  Paul  dit  qu'il  est  sacrificateur,  non  point  comme  anciennement  il  y  en  avoit  sous  la  Loy:  mais  par  le  glaive  de  l'Evangile  il  mortifie  les  hommes:  comme  il  falloit  que  les  sacrifices  fussent  tuez,  aussi  S.  Paul  dit  qu'il  a  le  glaive  spirituel  dont  il  presente  les  ames  a  Dieu.  Voila  ce  que  nous  avons  a  retenir.  Et  pourtant  que  ceux  qui  sont  appellez  en  cest  office  d'annoncer  la  parolle  de  Dieu,  cognoissent  qu'ils  doyvent  appliquer  toute  leur  estude  a  cela,  c'est  que  Dieu  soit  servi  et  honore.  Et  la  facon  nous  est  monstree  en  ce  passage  que  ie  vien  d'alleguer  du  quinziesme  des  Romains:  c'est  que  nous  advisions  de  sanctifier  tout  ce  qui  est  de  corrompu  en  ce  monde,  et  que  les  hommes  soyent  dociles,  et  debonnaires,  afin  que  Dieu  les  renouvelle,  et  qu'il  les  accepte  pour  ses  enfans:  et  quand  nous  en  ferons  ainsi,  voila  le  service  de  Dieu  qui  sera  accompli  en  nous  tel  qu'il  estoit  commande  anciennement  aux  Levites.  Venons  maintenant  au  troisiesme  article  qui  est  ici  contenu.  Il  est  dit,  que  les  Levites  doivent  benir  le  peuple  au  nom  de  Dieu.  Il  est  vray  que  Benir  en  la  langue  Hebraique,  signifie  bien  louer,  et  magnifier  Dieu  :  mais  d'autant  qu'il  est  ici  question  de  ceux  que  Dieu  ordonnoit  specialement  pour  benir  en  son  nom,  il  faut  que  nous  prenions  le  sens  de  ce  passage  du  sixiesme  chapitre  des  Nombres:  combien  que  ceste  sentence  soit  assez  frequente  en  Moyse.  Mais  la  elle  est  plus  expresse:  et  voila  pourquoy  i'ay  quotte  le  passage.  Il  est  dit  que  les  Sacrificateurs  de  la  maison  de  Levi  beniront  au  nom  de  Dieu,  et  diront:  2*