23:22  los  volare,  tantum  aperiamus  oculos  ad  hoc  lumen  quod  nobis  in  terra  Deus  accendit.  Qua  ratione  (ut  iam  monui)  satis  refellitur  eorum  improbitas  qui  Mosen  exagitant  quod  non  magis  exacte  loquutus  sit.  Nos  enim  potius  respexit  quam  sidera,  ut  theologum  decebat.  Nec  vero  eum  latebat  non  esse  tantum  in  luna  fulgoris  ut  terram  illustret,  nisi  a  sole  mutuetur:  verum  satis  habuit  docere  quod  palam  omnes  cernimus,  lunam  esse  nobis  lucis  ministram.  Quod  astrologi  corpus  opacum  esse  dicunt,  eatenus  verum  esse  concedo  ut  tenebrosum  esse  negem.  Nam  primo,  quum  superior  sit  ignis  elemento,  corpus  igneum  esse  necesse  est.  Hinc  sequitur  luminosum  quoque  esse:  sed  quia  non  tantum  habet  quod  ad  nos  usque  penetrando  sufficiat,  mutuo  a  sole  sumit  quod  deest.  Minus  luminare  dicit,  comparative:  quia  exigua  est  lucis  portio  quam  nobis  emittit,  prout  est  immensus  solis  fulgor.  16.  Luminare  maius.  Dixi  Mosen  non  hic  subtiliter  disserere  de  naturae  arcanis,  ut  philosophum  :  quod  in  his  verbis  videre  est.  Primum  planetis  et  stellis  in  expansione  coelorum  sedem  assignat  :  astrologi  vero  sphaerarum  distinctionem  tradunt,  et  simul  docent  stellas  fixas  proprium  habere  locum  in  firmamento.  Moses  duo  facit  magna  luminaria:  atqui  astrologi  firmis  rationibus  probant,  Saturni  sidus,  quod  omnium  minimum  propter  longinquitatem  apparet,  lunari  esse  maius.  Hoc  interest,  quod  Moses  populariter  scripsit  quae  sine  doctrina  et  literis  omnes  idiotae  communi  sensu  percipiunt:  illi  autem  magno  labore  investigant  quidquid  humani  ingenii  acumen  assequi  potest.  Nec  vero  aut  studium  illud  improbandum  est,  aut  damnanda  scientia,  ut  phrenetici  quidam  solent  audacter  reiicere  quidquid  est  illis  incognitum.  Nam  astrologia  non  modo  iucunda  est  cognitu,  sed  apprime  quoque  utilis:  negari  non  potest  quin  admirabilem  Dei  sapientiam  explicet  ars  illa.  Quare  ut  laudandi  sunt  ingeniosi  homines  qui  utilem  operam  hac  in  parte  sumpserunt:  ita  quibus  suppetit  otium  et  facultas,  hoc  exercitationis  genus  negligere  non  debent.  Nec  Moses  sane  ab  eo  studio  retrahere  nos  voluit,  quum  omisit  quae  sunt  artis  propria:  sed  quia  non  minus  indoctis  et  rudibus  quam  doctis  ordinatus  erat  magister,  non  aliter  potuit  suas  partes  implere  quam  si  se  demitteret  ad  crassam  istam  rationem.  Si  de  rebus  vulgo  ignotis  loquutus  foret,  causari  poterant  idiotae  altiora  haec  esse  captu  suo.  Denique  quum  hic  spiritus  Dei  promiscuam  omnibus  scholam  aperiat,  non  mirum  est  si  ea  maxime  deligat  quae  possint  ab  omnibus  intelligi.  Si  astrologus  veras  siderum  dimensiones  quaerat,  lunam  reperiet  Saturno  minorem,  verum  id  est  reconditum:  oculis  enim  aliud  apparet.  Ergo  Moses  ad  usum  potius  se  convertit.  Nam  quum  Dominus  manum  quodammodo  ad  nos  usque  porrigat,  dum  facit  ut  solis  et  lunae  2*