1:22  [CO  1.  22]  repraesentassent  quadringenti  illi  prophetae  qui  Ahab  mentiebantur  (1  Reg.  22)?  At  ecclesia  stabat  a  partibus  Micha,  solius  quidem  et  contemptibilis,  sed  ex  cuius  ore  verum  egrediebatur.  Nonne  et  nomen  et  faciem  ecclesiae  prae  se  ferebant  prophetae,  cum  uno  impetu  adversus  Ieremiam  insurgerent  et  minaces  iactarent:  fieri  non  posse,  ut  periret  lex  a  sacerdote,  consilium  a  sapiente,  verbum  a  propheta  (Ier.  18)?  Adversus  totam  prophetarum  nationem  solus  Ieremias  mittitur,  qui  a  Domino  denunciet:  fore  ut  lex  pereat  a  sacerdote,  consilium  a  sapiente,  verbum  a  propheta.  Nonne  talis  splendor  refulgebat  in  eo  concilio,  quod  pontifices,  scribae,  et  Pharisaei  collegerunt,  consilia  de  interficiendo  Christo  captaturi  (Ioan.  11)?  Eant  nunc  et  in  externa  larva  haereant,  ut  Christum  et  omnes  Dei  vivi [p. 31]  prophetas  faciant  schismaticos,  satanae  ministros  faciant  spiritus  sancti  organa.  Quod  si  ex  animo  loquuntur,  respondeant  mihi  bona  fide:  ubinam  gentium  ac  locorum  ecclesiam  residere  existiment,  ex  quo  Basiliensis  Concilii  decreto  deiectus  et  abdicatus  est  pontificatu  Eugenius,  subrogato  in  eius  locum  Amedaeo?  Negare,  vel  si  rumpantur,  nequeunt,  concilium,  quantum  ad  externos  ritus  attinet,  fuisse  legitimum,  nec  ab  uno  tantum  pontifice  sed  a  duobus  indictum.  Damnatus  est  illic  Eugenius  schismatis,  rebellionis,  pertinaciae,  cum  toto  Cardinalium  et  episcoporum  grege,  qui  cum  eo  Concilii  dissolutionem  admoliti  erant.  Postea  tamen,  principum  favore  sublevatus,  salvum  pontificatum  recepit.  Illa  Amedaei  electio,  generalis  et  sacrosanctae  synodi  autoritate  rite  peracta,  in  fumum  abiit,  nisi  quod  ipse  galero  cardinalitio,  ceu  canis  latrans  iniecta  offa,  placatus  est.  Ex  illorum  haereticorum,  rebellium,  pertinacium  gremio [p. 32]  prodiit,  quidquid  postea  Paparum,  Cardinalium,  episcoporum,  abbatum,  presbyterorum  fuit.  Hic  [OS  33]  deprehensi  haereant  necesse  est.  Utram  enim  in  partem  ecclesiae  nomen  conferent?  Negabuntne  concilium  generale  fuisse,  cui  nihil  ad  exteriorem  maiestatem  deerat?  Nempe  quod  duobus  diplomatibus  solemniter  indictum,  praesidente  Romanae  sedis  legato  consecratum,  rerum  omnium  ordine  bene  compositum,  2*