1:219  [CO  1.  219]  exigunt,  quam  initio  sumpserant.  Quid  sic  agendo  contendunt,  nisi  nullo  modo  errare  posse  concilia?  aut  si  errant,  nefas  tamen  esse  verum  cernere,  nec  assentari  erroribus?  Quare  nulla  conciliorum,  pastorum,  episcoporum,  ecclesiae  nomina,  quae  tam  falso  obtendi,  quam  vere  usurpari  possunt,  impedire  debent,  quo  minus  talibus  documentis  moniti,  omnes  omnium  spiritus  ad  divini  verbi  regulam  exigamus:  quo  probemus  num  ex  Deo  sint.  Iam  vero  referre  ad  apostolos  traditionum  originem,  quibus  hactenus  oppressa  est  ecclesia,  merae [p. 450]  sunt  imposturae:  quando  tota  in  hoc  incumbit  apostolorum  doctrina,  ne  novis  observationibus  onerentur  conscientiae,  aut  Dei  cultus  nostris  inventionibus  contaminetur.  Et  si  qua  historiis,  vetustisque  monumentis  inest  fides,  apostolis  non  ignotum  modo,  sed  inauditum  fuit,  quod  illis  tribuunt.  Nec  garriant,  pleraque  eorum  placita  usu  et  moribus  recepta  fuisse,  quae  scriptis  tradita  non  sint,  illa  scilicet,  quae  Christo  adhuc  vivente  intelligere  non  poterant,  post  eius  autem  ascensum  spiritus  sancti  revelatione  didicerint.  O  impudentiam.  Rudes  adhuc,  fateor,  et  indociles  erant  discipuli,  cum  istud  a  Domino  audirent.  Verum,  hacne  tarditate  tum  etiam  tenebantur,  cum  doctrinam  suam  scriptis  commendarent:  ut  viva  postea  voce  supplere  necesse  habuerint,  quod  in  scriptis  ignorantiae  vitio  omiserant?  Si  vero  iam  a  spiritu  veritatis  ducti  in  omnem  veritatem  sua  scripta  ediderunt,  quid  obfuit  quo  minus  perfectam  evangelicae  doctrinae  cognitionem  complexi  sint  [OS  249]  scriptis  suis,  consignatamque  reliquerint?  Praeterea  se  ridiculos  faciunt,  dum  ingentia  illa  mysteria,  quae  tanto  tempore  apostolis  incomperta  fuerint,  partim  observationes  esse  fingunt,  aut  iudaicas  aut  gentiles,  quarum  illae  inter  Iudaeos,  hae  vero  inter  gentes  omnes  pervulgatae  multo  ante  fuerant, [p. 451]  partim  ineptas  gesticulationes  et  aniles  caeremoniolas,  quas  insulsi  sacrificuli,  qui  nec  nare  sciunt  nec  literas,  perquam  rite  peragunt,  imo  quas  pueri  et  moriones  adeo  apposite  effingunt,  ut  videri  possit  nullos  esse  magis  idoneos  talium  sacrorum  antistites.  Non  multo  maiori  dexteritate  apostolorum  exemplum  praetexunt,  quo  suam  tyrannidem  defendant.  Apostoli,  inquiunt,  et  seniores  primae  ecclesiae  decretum,  praeter  Christi  mandatum,  sanxerunt,  quo  praecipiebant  gentibus  omnibus,  se  continere  ab  idolothytis  et  suffocato  et  sanguine  (Act.  15).  Id  si  illis  licuit,  cur  non  et  successoribus,  quoties  ita  res  postulat,  idem  imitari  liceat?  Utinam  vero  cum  semper  alias,  tum  hac  in  re,  eos  imitarentur.  Nam,  quod  valida  ratione  confirmare  promptum  est,  apostolos  novum  illic  quidquam  instituisse  aut  decrevisse  nego  ;  siquidem,  cum  in  eo  concilio  Petrus  tentari  Deum  pronunciet,  si  iugum  imponitur  cervicibus  discipulorum,  suam  ipse  sententiam  subvertit,  si  iugum