50:218  poterant,  expedire  pergat.  Priusquam  vero  ad  quaestionem  respondeat,  procul  repellit  tantam  absurditatem  more  suo:  ut  admoneat  quantopere  abominari  piae  aures  debeant  quidquid  est  in  Deum  contumeliosum.  Verum  subest  aliud  artificium  quod  observare  convenit.  Huius  enim  criminis  accusat  adversarios,  quod  Deum  sibi  ipsi  contrarium  faciant.  Nam  legem  et  promissiones  ab  eo  profectas  esse  constat.  Quisquis  ergo  aliquid  inter  eas  repugnantiae  inducit,  in  Deum  est  blasphemus.  Repugnant  autem  si  lex  iustificat.  Ita  appositissime  retorquet  in  adversarios  Paulus  quod  falso  et  calumniose  adversus  illum  intendebant.  Nam  si  data  esset  lex.  Responsio  est  indirecta  (ut  loquuntur),  quae  nondum  plane  consensum  legis  et  promissionum  declarat,  continet  tamen  quantum  satis  est  ad  tollendam  repugnantiam.  Prima  facie  diceres  hanc  sententiam  alienam  esse  a  contextu:  nec  quidquam  valere  ad  solutionem  quaestionis:  sed  non  est  ita.  Tunc  enim  adversaretur  lex  promissionibus,  si  vim  haberet  iustificandi.  Essent  enim  duae  rationes  contrariae  iustificandi  hominis,  et  veluti  duae  viae  inter  se  dissidentes  ad  consequendam  iustitiam.  Paulus  autem  hoc  adimit  legi.  Sublata  igitur  est  repugnantia.  Ego,  inquit,  concederem,  acquiri  iustitiam  ex  lege,  si  illic  salus  inveniretur.  Sed  quid?  22.  Conclusit  scriptura.  Nomine  scripturae  potissimum  legem  ipsam  designat.  Ea  includit  universos  mortales  sub  reatum:  ergo  iustitia  ipsos  spoliat  potius  quam  donet.  Validissima  ratio:  Tu  iustitiam  in  lege  quaeris  :  lex  autem  ipsa,  cum  tota  scriptura,  nihil  hominibus  relinquit  praeter  damnationem:  omnes  enim  homines  cum  suis  operibus  damnat  iniustitiae.  Quis  igitur  ex  lege  vivet?  Alludit  ad  illud,  qui  fecerit  haec,  vivet  in  ipsis.  Ab  illa,  inquam,  vita  exclusi  per  reatum,  salutem  frustra  in  lege  quaereremus.  Omnia  dicendo,  plus  expressit,  quam  si  omnes  dixisset.  Neque  enim  solos  homines,  sed  quaecunque  habent  vel  afferre  possunt,  complexus  est.  Ut  promissio  ex  fide.  Nullum  enim  aliud  remedium,  quam  ut  operum  iustitia  exuti  confugiamus  ad  Christi  fidem.  Certa  igitur  est  consequentia:  si  opera  in  iudicium  veniunt,  omnes  sumus  damnati.  Ergo  fide  Christi  obtinemus  gratuitam  iustitiam.  Caeterum  sententia  haec  plena  est  eximiae  consolationis:  admonemur  enim,  quoties  audimus  nos  damnari  in  scripturis,  paratam  esse  nobis  opem  in  Christo,  modo  nos  ad  ipsum  conferamus.  Perditi  sumus,  etiamsi  Deus  taceat.  Cur  ergo  toties  pronuntiat  nos  esse  perditos?  Nempe  ne  aeterno  exitio  pereamus:  sed  perculsi  tam  horribili  sententia  et  confusi,  fide  quaeramus  Christum,  per  quem  transeamus  a  morte  in  vitam.  In  voce