1:218  [CO  1.  218]  confringendasque  imagines,  alterum  restituendas  censuit.  Et  omnino  inter  orientalem  occidentalemque,  ut  vocant,  ecclesiam,  rara  concordia.  Eant  nunc  et  affixum  alligatumque  suis  conciliis  spiritum  sanctum  suo  more  iactent.  Neque  vero  hic  omnia  concilia  damnanda,  aut  omnium  acta  rescindenda,  et,  quod  dicitur,  una  litura  inducenda  disputo.  Video  enim  elucere  in  quibusdam,  praesertim  in  vetustis  illis,  verum  pietatis  studium,  notas  ad  haec  ingenii,  doctrinae,  prudentiae,  non  obscuras.  Nec  dubito  quin  aliis  quoque  aetatibus  habuerint  concilia  suos  melioris  notae  episcopos.  Sed  in  his  posterioribus  accidit,  quod  in  romanis  senatus  consultis  non  recte  fieri  olim  conquerebantur  ipsi  senatores.  Dum  enim  numerantur,  non  appenduntur  sententiae, [p. 448]  meliorem  partem  a  maiore  vinci,  saepius  necesse  fuit.  Quanquam  in  illis  quoque  antiquis  et  purioribus  est,  quod  iure  desideres,  vel  quod  eruditi  alioqui  et  prudentes  viri,  qui  tum  aderant,  praesentibus  negotiis  districti,  multa  alia  non  prospiciebant,  vel  quod  gravioribus  et  magis  seriis  occupatos  nonnulla  levioris  momenti  subterfugiebant,  vel  quod  simpliciter  imperitia  falli  poterant,  vel  quod  nimio  affectu  nonnunquam  praecipites  ferebantur.  Huius  postremi,  quod  omnium  durissimum  videtur,  exemplum  illustre  extitit  in  Nicaena  synodo,  cuius  dignitas  omnium  consensu  summa  veneratione  excepta  est.  Nam  cum  primarium  illic  fidei  nostrae  caput  periclitaretur,  adesset  hostis  Arius  in  procinctu,  quocum  manus  conserendae  essent,  summum  vero  momentum  esset  in  eorum  concordia,  qui  ad  oppugnandum  Arii  errorem  parati  venerant;  ipsi  nihilominus  tantorum  discriminum  securi,  [OS  248]  imo  velut  gravitatis,  modestiae  et  omnis  humanitatis  obliti,  omisso  quod  in  manibus  erat  certamine,  quasi  ex  destinato  Ario  gratificaturi  eo  concessissent,  intestinis  dissidiis  sese  proscindere  coeperunt,  stylum  qui  in  Arium  stringendus  erat,  in  seipsos  dirigere.  Foedae  criminationes  audiebantur,  libelli  accusatorii  volitabant,  nec  contentionum  finis  ullus [p. 449]  factus  esset,  donec  mutuis  vulneribus  se  confodissent,  nisi  Imperator  Constantinus  occurrisset;  qui  inquisitionem  in  eorum  vitam,  rem  esse  supra  suam  cognitionem  professus,  talem  intemperiem  laude  magis  quam  obiurgatione  castigavit.  Quam  multis  partibus  similiter  et  alia,  quae  deinde  sequuta  sunt  concilia,  lapsa  fuisse  verisimile  est?  Ineptus  forte  alicui  videar,  qui  de  commonstrandis  huiusmodi  erroribus  laborem,  cum  fateantur  adversarii,  errare  concilia  posse,  in  iis  quae  ad  salutem  non  sunt  necessaria.  Sed  neque  supervacuus  est  hic  labor;  tametsi  enim  coacti,  verbo  id  quidem  fatentur,  cum  tamen  omnem  conciliorum  determinationem,  in  re  qualibet,  nullo  discrimine,  pro  spiritus  sancti  oraculo  nobis  obtrudant,  plus