10.1:217  CONSILIA.  multorum  calumniis.  Atqui  N.  convictus  iam  satis  tenetur  bis  (displosa  in  N.  bombardula  ex  qua  secunda  vice  ignis  emicarit)  tentatae  caedis.  Accedit  quod  iam  antea  parum  ex  officio  sese  gessit  inter  vos,  ut  mirum  sit  tamdiu  tolerari  potuisse.  Ut  igitur  eam  provinciam  deinceps  retineat,  qua  sese  plane  indignum  praebuit,  nobis  quidem  nullo  modo  probari  potest.  Nominatim  quod  ita  praefracte  detrectavit  acquiescere  piissimae  exhortationi  vestrae,  ita  hoc  exaggerat  hominis  factum,  ut  abdicandum  plane  iam  constet.  In  modo  autem  agendi  hoc  consilium  damus,  ut  deligatis  ex  vestro  coetu  qui  totius  coetus  nomine  aperiant  fratribus  N.  uti  rationibus  idoneis  mature  ac  legitime  expensis  pronunciatum  fuerit  N.  ferendum  non  esse  amplius  in  ministerio  quod  male  exercuerit:  proinde  rogare  ut  illius  loci  ecclesia  ipsum  etiam  a  se  emittat,  ac  probet  ut  in  eius  locum  submittendus  alius  eligatur,  quem  et  ipsi  agnoscant  et  approbent.  Si  ecclesia  requiret  rationes  iudicii,  ut  plenius  de  re  tota  ipsis  liqueat,  tum  demum  expediet  eadem  illa  ipsis  articulatim  proponere,  quae  a  vobis  accepimus.  Quod  si  ita  ille  populum  loci  pellexerit  atque  irretient  suis  artibus,  ut  ipsi  non  acquiescant  vestro  consilio  et  exhortationi,  tum  demum  admonendi  erunt  serio,  videant  uti  hoc  admissuri  sint:  quum  si  in  eo  obstinate  perstent,  schismaticos  sese  exhibituri  sint,  unde  et  ipsos  a  vestri  corporis  unitate  separandi  iniicienda  sit  vobis  necessitas.  Quod  ad  alterum  attinet,  quia  plus  in  illo  est  imprudentiae  et  impetus  quam  certae  improbitatis,  satis  fore  videtur,  si  ecclesiae  etiam  ipsius  significetur  suspendi'  illum  a  ministerio:  tum  ut  ipse  sese  ita  humiliet,  tum  etiam  ut  scandalum  sarciatur:  atque  illud  ita  demum,  ut  quoties  ipsis  videbitur,  ipsum  liceat  repetere  et  recipere  in  ministrum.  Monendi  autem  erunt  nominatim  si  de  illo  repetendo  agetur,  non  aliter  hoc  posse  procedere,  quam  ut  ipsi  etiam  omnem  culpae  ipsius  memoriam  sepeliant,  neque  ipsi  ullo  modo  quod  acciderit,  exprobrent,  neve  haec  temporalis  castigatio  illi  sit  fraudi,  quominus  ipsi  integrum  sit  alios  deinceps  reprehendere  ex  ministerii  ratione,  adeoque  ut  doctrina  ipsius  plenum  ius  et  autoritatem  quam  meretur,  obtineat.  Optassemus  quidem  in  mitiorem  sententiam  inclinare  si  fieri  potuisset,  sed  veriti  sumus  ne  parcendo  illis  Dominus  interea  tanto  minus  parceret.  Valete  fratres  dilectissimi.  Dominus  suo  vos  praesidio  tueatur,  spiritu  confirmet,  atque  sua  in  vobis  dona  semper  adaugeat.  Genevae  in  nostro  coetu.  Vester  Io.  Calvinus  omnium  nomine.