55:216  functionem  referenda  sunt.  Verum  ut  singula  melius  pateant,  digerendus  est  hic  locus  in  certas  propositiones.  Sit  itaque  haec  prima:  quod  prophetae  qui  de  gratia,  quam  nobis  exhibuit  Christus  suo  adventu,  vaticinati  sunt,  sedulo  intenti  fuerunt  ut  tempus  plenae  revelationis  cognoscerent.  Secunda:  quod  spiritus  Christi  per  eos  praedixit  futurum  regni  Christi  statum,  qualis  partim  iam  cernitur,  partim  vero  speratur  adhuc:  nempe  quod  Christo  et  universo  eius  corporis  destinatus  sit  per  varias  passiones  ad  gloriam  ingressus.  Tertia:  quod  prophetae  nobis  uberius  quam  suo  saeculo  ministrarunt:  idque  divinitus  illis  patefactum  fuit:  quia  in  Christo  demum  est  solida  earum  rerum  exhibitio,  quarum  tunc  obscuram  imaginem  Deus  adumbrabat.  Quarta:  quod  non  tantum  in  evangelio  continetur  luculenta  propheticae  doctrinae  confirmatio,  quando  idem  spiritus  est  qui  loquitur,  sed  longe  plenior  et  magis  familiaris  explicatio:  quia  salutem,  quam  eminus  olim  per  prophetas  indicabat,  nunc  palam  et  quasi  oculis  demonstrat.  Ultima  est:  inde  satis  constare  quam  admirabilis  sit  salutis  per  evangelium  nobis  promissae  gloria,  quod  angeli  quoque  ipsi,  licet  Dei  conspectu  in  coelis  fruantur,  illius  tamen  visendae  desiderio  ardeant.  Omnia  vero  in  unum  scopum  tendunt,  ut  Christiani,  dum  in  suae  felicitatis  altitudinem  efferuntur,  omnia  mundi  obstacula  superent.  Quid  enim  est  quod  non  extenuet  incomparabile  hoc  beneficium?  10.  De  qua  salute.  Annon  patribus  et  nobis  communis  eademque  est  salus?  Cur  ergo  patres  quaesiisse  dicit,  quasi  non  adepti  sint  quod  hodie  nobis  offertur?  Facilis  solutio  est,  salutem  pro  conspicua  manifestatione  accipi,  quae  nobis  obtigit  Christi  adventu.  Neque  aliud  sibi  volunt  haec  Petri  verba,  quam  illa  Christi  (Matth.  13,  16):  multi  reges  et  prophetae  optarunt  videre  quae  videtis,  nec  tamen  viderunt:  beati  igitur  oculi  vestri,  ete.  Quum  ergo  prophetae  non  nisi  tenuem  haberent  gustum  allatae  per  Christum  gratiae,  quantum  ad  revelationis  modum  attinet,  merito  ultra  votis  suis  tendebant.  Dum  Simeon  post  Christi  conspectum  placide  et  animo  pacato  se  ad  mortem  comparat,  se  prius  inquietum  et  anxium  fuisse  ostendit.  Talis  fuit  omnium  piorum  sensus.  Et  modum  inquisitionis  denotat,  quum  addit,  in  quem  aut  cuiusmodi  temporis  articulum.  Erat  enim  differentia  legis  et  evangelii,  quasi  interpositum  velum,  ne  propius  ea,  quae  oculis  nostris  exposita  sunt,  adspicerent.  Nec  sane  aequum  erat,  absente  adhuc  sole  iustitiae,  Christo,  plenam  lucem  tanquam  in  meridie  fulgere.  Tametsi  autem  ipsis  necesse  fuit  intra  praescriptos  fines  se  continere:  nulla  tamen  religio  fuit  ingemiscere  propioris  adspectus  desiderio.  Neque  enim  quum  accelerari  redemptionem,  et  quotidie  eam  videre  cuperent,  votum  illud  ob-