52:216  communi  fidelium  coetu  excludit.  Quo  docemur  excommunicationis  disciplina  utendum  esse  adversus  omnes  praefractos,  qui  aliter  in  ordinem  cogi  non  sustinent,  et  ignominia  notandos,  donec  subacti  et  domiti  parere  discant.  Ut  pudefiat.  Sunt  quidem  alii  etiam  excommunicandi  fines:  ne  contagio  scilicet  latius  serpat,  et  ne  privatum  unius  hominis  flagitium  in  commune  ecclesiae  dedecus]  redundet,  atque  ut  severitatis  exemplum  alios  ad  timorem  erudiat:  sed  Paulus  hic  unum  attigit,  ut  pudore  ad  resipiscentiam  cogantur  qui  peccarunt.  Nam  qui  sibi  in  vitiis  placent,  magis  ac  magis  redduntur  obstinati.  Sic  alitur  peccatum  indulgentia  et  dissimulatione.  Optimum  ergo  hoc  remedium  est,  quum  pudor  incutitur  peccatori,  ut  sibi  displicere  incipiat,  Esset  quidem  hic  per  se  tenuis  profectus,  habere  hominum  verecundiam:  sed  Paulus  ulteriorem  progressum  respexit,  dum  scilicet  agnitione  suae  turpitudinis  confusus  peccator  hoc  modo  ad  plenam  correctionem  adducitur.  Est  enim  pudor  sicuti  tristitia  utilis  ad  peccati  odium  praeparatio.  Quare  hoc  fraeno  coercendi  sunt  (ut  dixi)  quicunque  lasciviunt,  ne  ex  impunitate  crescat  audacia.  15.  Ne  tanquam  inimicum.  Rigori  temperamentum  mox  adhibet:  nam  sicut  alibi  (2.  Corin.  2,  7)  praecipit,  cavendum  est  ne  absorbeatur  moerore  qui  peccavit:  quod  fieret  si  immodica  esset  severitas.  Itaque  videmus  talem  debere  esse  huius  disciplinae  usum,  ut  eorum  saluti  consulatur  in  quos  animadvertit  ecclesia.  Fieri  autem  non  aliter  potest  quin  exulceret  severitas,  ubi  modum  excedit.  Ergo  si  prodesse  volumus,  necessaria  est  mansuetudo  et  lenitas,  ut  qui  reprehenduntur  nihilominus  se  amari  intelligant.  In  summa,  huc  non  tendit  excommunicatio,  ut  alienet  homines  a  grege  Domini,  sed  potius  ut  palatos  et  vagos  revocet.  Sed  notandum  est  quo  signo  fraternum  amorem  probari  iubeat.  Non  blanditiis  scilicet,  vel  adulatione,  sed  monitionibus.  Sic  enim  fiet  ut  salutis  suae  curam  haberi  sentiant  quicunque  non  erunt  incurabiles.  Interim  ab  anathemate  discernitur  excommunicatio.  Nam  quos  censurae  suae  severitate  notat  ecclesia,  Paulus  non  prorsus  abiici  debere  admonet,  quasi  a  spe  salutis  abdicati  essent:  sed  dandam  operam  ut  ad  sanam  mentem  revocentur.  16.  Ipse  autem  Dominus  pacis.  Videtur  haec  precatio  proximae  sententiae  annexa,  ut  concordiae  et  lenitatis  studium  commendet.  Vetuerat*)  hostilem  in  modum  tractare  etiam  contumaces,  donec  fraternis  monitionibus  ad  sanam  mentem  reducerentur.  Opportune  subiicere  praeceptum  potuit  de  colenda  pace:  sed  quia  hoc  vere  divinum  est  opus,  ad  precationem  confugit,  quae  tamen  ipsa  vim  quoque  *)  Voluerat.