27:216  voila  tous  hors  du  chemin  de  salut.  Or  puis  qu'ainsi  est  que  nous  en  trouverons  un  bien  petit  nombre  qui  soit  pour  nous  adresser,  et  que  tout  le  reste  ne  fera  que  nous  tirer  a  mal:  que  sera-ce  si  nous  voulons  nous  fonder  sur  la  coustume?  Si  nous  disons:  O!  il  y  en  a  tant  qui  trouvent  ceci  bon.  Voire,  mais  Dieu  le  reprouve:  et  ce  n'est  rien  des  hommes,  comme  nous  voyons  qu'ils  sont  tous  adonnez  a  mal,  ils  sont  corrompus  en  leur  sens:  et  puis  en  leur  coeur  il  n'y  a  que  malice,  qu'ils  tirent  tout  au  rebours  de  ce  que  Dieu  leur  avoit  monstre.  Et  si  nous  alleguons:  O!  ce  n'est  point  d'auiourd'huy  que  cela  commence  :  car  l'usage  est  de  toute  anciennete.  Voire,  c'est  autant  comme  si  nous  disions  que  le  monde  est  endurci:  mais  si  n'est-il  point  entre  en  possession,  pour  empescher  que  Dieu  ne  soit  Iuge,  et  qu'il  ne  le  condamne  selon  qu'il  en  est  digne.  Et  ainsi  notons  bien  qu'il  nous  est  ici  declaire,  que  si  nous  cheminons  apres  ceux  qui  ont  erre:  quand  Dieu  les  aura  punis,  il  faudra  que  nous  venions  apres  a,  conte:  et  mesmes  nous  meritons  d'estre  punis  au  double,  quand  nous  n'avons  point  fait  nostre  profit  des  corrections  que  Dieu  nous  avoit  monstrees  :  car  c'est  autant  comme  si  nous  luy  resistions  a  nostre  escient.  C'est  en  somme  ce  que  nous  avons  a  recueillir  de  ce  mot,  la,  ou  Moyse  parle  des  filets  qui  sont  tendus:  c'est  quand  nostre  Seigneur  nous  aura  advertis,  et  que  nous  aurons  veu  mesmes  des  exemples  devant  nos  yeux,  que  nous  y  appliquions  nostre  estude,  afin  de  ne  nous  point  envelopper  parmi  la  malediction  qui  est  apprestee  aux  contempteurs  de  la  parolle  de  Dieu.  Or  il  est  dit  encores:  Qu'on  ne  s'enquiere  point  de  leurs  dieux.  Par  cela  il  monstre,  que  les  hommes  souventesfois  par  leurs  folles  curiositez  sont  divertis  du  bien.  Car  quand  nous  aurons  este  enseignez  en  la  pure  simplicite  de  la  parolle  de  Dieu,  si  nous  tenons  nos  esprits  captifs,  c'est  a  dire,  que  nous  fussions  contens  d'avoir  la  verite:  il  est  certain  qu'alors  nostre  Seigneur  nous  confernieroit  de  plus  en  plus,  et  quand  tout  le  monde  seroit  en  dissipation,  nous  serions  tousiours  unis  en  bonne  concorde  de  foy:  mais  nos  esprits  s'escoulent,  comme  ils  sont  vollages,  nous  ne  pouvons  pas  nous  tenir  de  nous  enquester  de  ceci  et  de  cela:  non  point  qu'il  nous  apporte  profit,  nous  ne  savons  quelle  est  la  raison:  tant  y  a  que  nostre  convoitise  nous  chatouille,  et  nous  solicite  tellement,  que  nous  ne  pouvons  demeurer  tout  coys,  pour  dire:  Obeissons  a,  nostre  Dieu.  Moyse  notamment  a  voulu  condamner  ce  vice  qui  regne  par  trop  aux  hommes,  et  qui  est  enracine  en  leur  nature:  c'est  qu'au  lieu  d'avoir  une  sobriete  pour  nous  retenir  en  la  pure  obeissance  de  la  parolle  de  Dieu,  nous  sommes  tousiours  agitez  de  vaines  phantasies,  et  ne  demandons  sinon  de  nous  enquerir  que  c'est