10.1:216  constat  ab  una  Dei  providentia  quae  adversarios  constrictos  tenet,  stare,  ne  qui  vestrum  exitium  toties  iam  designarunt,  vel  levissima  occasione  oblata  in  illud  ferantur  praecipites.  Quamobrem  aliter  de  N.  et  N.  iudicare  quam  de  abreptitiis  non  possumus,  quibus  ita  simul  ac  semel  exciderit  cum  ipsorum  ministerii  ratione  illa  etiam  consideratio,  quod  ipsorum  audacia  extremam  omnibus  istic  ecclesiis  perniciem  allatura  esset.  Ac  primum  quidem  probari  a  nobis  illud  non  potest,  quod  ministri  verbi  ita  ad  gerenda  ipsi  arma  et  eiusmodi  rerum  tractationem  sese  applicent.  Scimus  aliquando  urgente  necessitate  accidere,  ut  intra  officii  metas  non  ita  praecise  sese  singuli  contineant.  Scimus  etiam  eousque  invaluisse  pericula,  ut  cuique  pro  virili  adversum  illa  enitendum  fuerit.  Atqui  illud  videre  non  possumus,  qui  tolerari  possit  ut  verbi  ministri  agminum  duces  evadant,  ac  proinde  et  copias  ipsi  cogant,  et  coactas  iidem  perducant.  Ita  fit  enim  ut  ab  officio  quisque  tantundem  recedat,  ac  prorsus  a  vocatione  sua  degeneret,  quod  et  istis  accidit  nominatim.  Ex  eo  enim  accidit  ut  ad  mores  stratioticos  occalluerint,  utque  exuta  penitus  illa  ministerii  persona,  in  licentiam  militarem  proruperint.  Sic  nos  loqui  res  ipsa  cogit:  plane  enim  confusi  hisce  auditis  iacuimus:  etsi  ex  literis  vestris  unius  prae  altero  gravius  est  malum,  quod  ab  utroque  admissum  est.  Nunc  vero  quum  quid  nobis  videatur  exspectatis,  sic  ipsi  in  Domino  congregati  vobis  respondendum  duximus.  Ac  priioum  omnium  nisi  omnia  sursum  ac  deorsum  ferri  volumus,  non  potest  tam  indignum  scelus  et  enorme  dissimulatione  ac  conniventia  sepeliri.  Si  quaeratur  a  N.  cur  ex  Comitatu  Monsbelgardensi  abierit,  parata  erit  responsio,  quia  nempe  omnia  illic  essent  confusa,  quum  nullus  disciplinae  status  exstaret.  Atqui  si  nos  ipsi  aliis  disciplinam  praescribimus,  quanto  arctioribus  vinculis  ipsimet  nobis  adstringi  debemus?  Iam  ut  huic  malo  remedium  afferatur,  satis  videmus  quid  incommodi  sequuturum  sit,  ubi  qui  sunt  in  culpa  non  admittent  reprehensionem,  sed  iugum  excutere  conabuntur:  sed  tamen  quidquid  accidat,  ferendum  non  est,  ut  nostra  timiditate  foveatur  malum.  Proinde  ubi  hoc  agitur,  ut  et  rectus  ordo  retineatur  et  scandala  comprimantur,  qualescunque  immineant  procellae  et  tempestates:  non  est  committendum  tamen  ut  de  constantia  et  legitima  fortitudine  quidquam  remittatur,  maxime  ubi  contrahendum  est  fraenum.  Quamobrem  videre  non  possumus  ut  quod  istis  accidit,  silentio  transmitti  possit,  quin  ea  occasione  maledictio  Domini  inhaereat  vobis,  et  incumbat  perpetuo.  Locus  Pauli  1,  Tim.  5  quo  sese  tueri  cogitat  N.  eum  nullo  modo  iuvat:  illic  enim  eatenus  voluit  Paulus  rationem  haberi  servorum  Dei,  ut  ipsorum  innocentiae  consulatur,  quando  ut  plurimum  obnoxii  esse  solent