1:216  [CO  1.  216]  ad  sacerdotem  quilibet  operatur  mendacium;  item:  (Ier.  14):  Prophetae  mendacium  prophetant  in  nomine  meo,  cum  ego  non  miserim  eos,  neque  praeceperim  eis.  Iam  et  Iezechiel  (Ez.  22):  Coniuratio  prophetarum  eius  in  medio  eius,  sicut  leo  rugiens  et  qui  rapit  praedam.  Animam  comederunt  et  quod  pretiosum  est  rapuerunt  et  viduas  multiplicaverunt  in  medio  eius.  Sacerdotes  eius  violaverunt  legem  meam,  et  profanaverunt  sancta  mea,  nec  discrimen  fecerunt  inter  sanctum  et  profanum.  Prophetae  leverunt  eis  caementa  insulsa,  videntes  vana  et  divinantes  mendacium,  sic  dicentes:  Dominus  locutus  est,  cum  non  sit  locutus.  Item  Zephanias  (Zeph.  3)  :  Prophetae  eius  inconstantes,  viri  mendaces;  sacerdotes  eius  violaverunt  sancta,  et  transgressi  sunt  legem.  Praeterea,  quoties  a  Christo  et  eius  apostolis  praedictum:  ut  a  pastoribus  summa  ecclesiae  pericula  impenderent  (Matth.  24.  Act.  20.  2  Thess.  2.  1  Tim.  4.  2  Tim.  3  et  4.  2  Petr.  2)?  Ac  ne  enumerando  multum  chartarum  impleam,  non  eorum  temporum  modo,  sed  omnium  fere  saeculorum  exemplis  monemur,  nec  veritatem  semper  in  sinu  pastorum  ali,  nec  ecclesiae  incolumitatem  ab  eorum  statu  pendere.  Decebat  quidem  illos  ecclesiasticae  pacis  ac  salutis,  cui  conservandae  destinati  sunt,  praesides  esse  ac  custodes.  Sed  aliud  est,  praestare  quod  debeas,  aliud  debere  quod  non  praestes.  Neque  tamen  nostra  ista  verba  in  eam  partem  quis  accipiat, [p. 444]  quasi  pastorum  autoritatem  passim  ac  temere,  nulloque  delectu,  labefactandam  censeam.  Tantum,  inter  eos  ipsos  delectum  haberi  velim,  ne  qui  dicuntur  pastores  quoque  esse  protinus  existimemus.  Nam  sic  omnino  habendum  est,  totam  eorum  functionem  verbi  Dei  ministerio,  totam  sapientiam  eius  verbi  cognitione,  totam  facundiam  eius  praedicatione  terminatam;  a  quo  si  declinarint,  sensu  fatuos  esse  et  hebetes,  lingua  balbos,  partibus  omnibus  infideles  et  officii  desertores,  sive  prophetae  sint,  sive  episcopi,  sive  doctores,  seu  quidvis  etiam  aliud  maius.  Non  de  uno  aut  altero  loquor:  universa  simul  pastorum  natio,  si  relicto  Dei  verbo  sensu  suo  feratur,  nihil  aliud  quam  infatuati  poterit.  Atqui  isti  non  alia  ratione,  nisi  quia  pastores  sunt,  excussa  abiectaque  verbi  Dei  obedientia,  in  dissolutam  licentiam  sese  tradunt.  [OS  246]  Quasi  non  fuerit  pastor  Iosua,  cui  dictum  fuit  (Ios.  1),  ne  declinaret  ad  dextram  aut  sinistram,  sed  custodiret  et  observaret  universa  praecepta  legis.  Et  interim  persuadere  contendunt,  sese  luce  veritatis  destitui  non  posse,  spiritum  Dei  perpetuo  in  se  residere,  ecclesiam  in  se  subsistere  et  secum  emori.  Quasi  vero  iam  nulla  sint  Domini  iudicia,  ut  non  eadem  nunc  quoque  evenire  possint,  quae  prophetae  sui  saeculi  hominibus  denunciabant, [p. 445]  qualia  sunt:  Obstupescent  sacerdotes  et  prophetae  terrebuntur  (Ier.