55:214  Christum,  quem  non  viderunt,  diligant:  in  eum,  quem  non  conspiciunt,  credant.  Sed  prius  ex  posteriore  nascitur.  Dilectionis  enim  causa  est  fides,  non  ideo  tantum  quia  nos  beneficiorum  quibus  nos  Christus  prosequitur,  cognitio  ad  eum  redamandum  provocat:  sed  quia  perfectam  felicitatem  offerendo,  nos  ad  se  rapit.  Laudat  ergo  Iudaeos  quod  in  Christum  credant  quem  non  adspiciunt  :  ut  cogitent  hanc  esse  fidei  naturam,  in  bonis,  quae  oculos  nostros  latent,  acquiescere:  nam  eius  rei  aliquod  habebant  experimentum.  Quamquam  magis  laudando  praecipit.  Atque  hoc  prius  ordine  membrum  est,  non  metiendam  esse  fidem  adspectu.  Nam  quum  misera  in  speciem  sit  Christianorum  vita,  nisi  felicitas  eorum  in  spe  sita  esset,  protinus  conciderent.  Habet  quidem  et  fides  suos  oculos,  sed  qui  in  regnum  Dei  invisibile  penetrant,  et  qui  speculo  verbi  contenti  sunt.  Est  enim  demonstratio  rerum  invisibilium,  ut  habetur  in  Epistola  ad  Hebraeos  (ll,  1).  Quare  verum  est  illud  Pauli  (2.  Corin.  5,  6),  nos  peregrinari  a  Domino  quamdiu  hac  carne  sumus  circumdati,  quia  per  fidem  ambulamus,  et  non  per  adspectum.  Secundum  membrum  est,  Fidem  non  frigidam  esse  notitiam,  sed  quae  corda  nostra  inflammat  in  amorem  Christi.  Neque  enim  (ut  sophistae  garriunt)  fides  confuse  et  implicite  Deum  apprehendit  (quia  hoc  est  vagari  per  invios  errores),  sed  Christum  pro  scopo  habet.  Porro  non  arripit  nudum  Christi  nomen,  aut  nudam  essentiam:  sed  qualis  sit  nobis,  et  quid  afferat  bonorum,  considerat.  Quia  fieri  non  potest  quin  eo  feratur  hominis  affectus,  ubi  felicitatem  suam  statuit  :  secundum  illud  :  ubi  thesaurus  tuus,  ibi  cor  tuum  (Matth.  6,  21).  Exsultatis.  Iterum  repetit  fructum  illum  fidei  cuius  meminerat,  nec  immerito:  est  enim  incomparabile  hoc  bonum,  quod  non  modo  pacatae  sunt  coram  Deo  conscientiae,  sed  iam  vitae  aeternae  fiducia  secure  exsultant.  Yocat  autem  gaudium  inenarrabile,  quia  pax  Dei  sensum  omnem  exsuperat.  Quod  hic  addit  glorificatum,  bifariam  potest  exponi:  vel  ut  magnificum  ac  gloriosum  significet:  vel  ut  inani  fluxoque  opponatur,  cuius  homines  paulo  post  pudet.  Ita  glorificatum  perinde  valebit  atque  solidum  et  stabile,  et  extra  periculum  frustrationis.  Qui  hac  laetitia  non  efferuntur  supra  coelos,  ut  solo  Christo  contenti  mundum  despiciant,  frustra  iactant  se  habere  fidem.  9.  Reportantes  finem.  Admonet  quorsum  sensus  omnes  suos  dirigere  fideles  debeant,  nempe  in  salutem  aeternam.  Mundus  enim  hic  affectus  nostros  suis  illecebris  irretitos  tenet:  vita  haec  et  quaecunque  ad  corpus  pertinent,  magna  sunt  impedimenta,  ne  animus  noster  ad  futurae  et  spiritualis  vitae  cogitationem  se  applicet.  Hanc  ergo  nobis  toto  studio  meditandam  proponit  apostolus  :  et  tacite  U*