1:214  [CO  1.  214]  in  alium  sensum,  quam  quo  dicta  sunt,  perverse  torqueant.  Simpliciter  ergo  fatemur  id  quod  res  habet:  Dominum  perpetuo  suis  adesse  et  eos  spiritu  suo  regere;  hunc  spiritum  non  esse  erroris,  ignorantiae,  mendacii,  aut  tenebrarum: [p. 439]  sed  revelationis,  veritatis,  sapientiae  ac  lucis,  a  quo  non  fallaciter  discant,  quae  sibi  a  Deo  donata  sint:  hoc  est,  quae  sit  spes  vocationis  suae  et  quae  divitiae  gloriae  haereditatis  Dei  et  quae  supereminens  magnitudo  virtutis  eius  in  omnes  credentes  (1  Cor.  2.  Eph.  1)  Praeterea,  Dominum  eam  in  ecclesia  sua  posuisse  gratiarum  divisionem,  ut  semper  essent,  qui  ad  ipsius  aedificationem  singularibus  donis  excellerent  (Eph.  4).  Dedit  enim  apostolos,  prophetas,  doctores,  pastores,  qui  omnes  diversis  quidem  ministeriis,  sed  uno  animo  in  communem  ecclesiae  aedificationem  incumberent,  donec  occurramus  omnes  in  unitatem  fidei  et  agnitionis  filii  Dei,  in  virum  perfectum,  in  mensuram  aetatis  plenitudinis  Christi.  Verum  cum  primitias  et  quendam  duntaxat  gustum  eius  spiritus  percipiant  in  hac  carne  fideles,  etiam  qui  excellentioribus  illis  gratiis  prae  aliis  donati  sunt,  nihil  illis  potius  restat,  quam  imbecillitatis  suae  conscios,  sese  intra  fines  verbi  Dei  sollicite  continere,  ne  si  sensu  suo  longius  evagentur,  a  recta  via  protinus  aberrent.  Et  sane  minime  quoque  dubium  esse  debet,  quin  si  a  verbo  Dei  vel  pauxillum  deflectant,  in  multis  labi  contingat;  quatenus  scilicet  spiritu  illo  adhuc  vacui  sunt,  quo  solo  docente  mysteria  Dei  perspiciuntur.  Nam  quod  Paulus  scribit  (Eph.  4), [p. 440]  Christum  mundasse  ecclesiam  lavacro  aquae,  in  verbo  vitae,  ut  exhiberet  sibi  gloriosam  sponsam,  non  habentem  maculam  aut  rugam,  aut  aliquid  huiusmodi,  sed  ut  sit  sancta  et  immaculata,  magis  docet  quid  quotidie  in  suis  operetur  Christus,  quam  quid  iam  perfecerit.  Nam  si  eos  in  dies  sanctificat,  expurgat,  expolit,  maculis  abstergit,  certe  adhuc  naevis  ac  rugis  quibusdam  aspersos  esse,  eorumque  sanctificationi  deesse  nonnihil  constat.  Ecclesiam  vero  sanctam,  immaculatam  iam  censere,  cuius  membra  omnia  maculosa  et  nonnihil  impura  sint,  quam  inane  ac  fabulosum  est?  Verum  est  itaque  quod  Christus  ecclesiam  lavacro  aquae  mundaverit  in  verbo  vitae;  hoc  est,  remissione  peccatorum  abluerit,  cuius  ablutionis  symbolum  est  baptismus;  atque  id  quidem,  ut  eam  sibi  sanctificaret.  At  eius  sanctificationis  initium  hic  duntaxat  visitur,  finis  vero  et  solidum  complementum  extabit,  cum  sanctus  sanctorum  Christus  sua  sanctitate  vere  et  solide  ipsam  implebit.  Quamobrem  tanta  istarum  promissionum  amplitudine  confisa  fidelium  ecclesia  [OS  244]  habet  unde  fidem  suam  praeclare  sustineat,  quando  nihil  addubitat,  quin  spiritum  sanctum  semper  habeat  optimum  ac  certissimum  rectae  viae  ducem.  Nec  vana  fiducia  14*