55:212  6.  In  quo  exsultatis  paulisper  nunc,  si  opus  est,  contristati  in  variis  tentationibus:  7.  ut  probatio  fidei  vestrae  multo  pretiosior  auro  quod  perit,  et  tamen  per  ignem  probatur,  reperiatur  in  laudem  et  honorem  et  gloriam^  quum  revelabitur  Iesus  Christus.  8.  Quem  quum  non  videritis,  diligitis:  in  quem  nunc  credentes,  quum  eum  non  adspicitis,  exsultatis  gaudio  inenarrabili  et  glorificato:  9.  Eeportantes  finem  fidei  vestrae,  salutem  animarum.  6.  In  quo  exsultatis.  Tametsi  ambigua  est  graeci  verbi  terminatio,  sensus  tamen  postulat  ut  legamus  exsultatis  potius  quam  exsultate.  Articulus  in  quo,  refert  totum  illud  complexum  de  spe  salutis  in  coelo  repositae.  Caeterum  non  tam  eos  laudat,  quam  hortatur.  Consilium  enim  eius  est  docere  quisnam  ex  spe  salutis  fructus  nobis  proveniat:  nempe  spirituale  gaudium,  quo  non  tantum  mitigatur  malorum  omnium  acerbitas,  sed  omnis  etiam  tristitia  vincitur.  Quamquam  exsultandi  verbum  plus  exprimit,  quam  gaudere.  Sed  hoc  nonnullam  habet  repugnantiae  speciem,  dum  fideles,  qui  gaudio  exsultant,  simul  tristes  esse  dicit.  Sunt  enim  contrarii  affectus.  Verum  melius  experimento  norunt  fideles,  illos  simul  consistere,  quam  verbis  exprimi  queat.  Et  tamen  ut  paucis  expediatur  haec  quaestio,  sic  habendum  est,  fideles  non  esse  truncos,  nec  humanum  sensum  ita  exuisse  quin  dolore  tangantur,  quin  pericula  metuant,  quin  molesta  sit  paupertas,  quin  difficiles  ac  durae  persequutiones.  Tristitiam  ergo  ex  malis  sentiunt:  sed  quae  ita  lenitur  fide,  ut  gaudere  propterea  non  desinant.  Ita  non  impedit  tristitia  ipsorum  gaudium,  sed  potius  locum  illi  cedit.  Rursus  gaudium  tametsi  tristitiam  superat,  eam  tamen  non  abolet:  quia  nos  humanitate  non  spoliat.  Atque  hinc  patet  quae  sit  vera  patientia.  Initium  eius  et  quasi  radix  est  beneficiorum  Dei  agnitio,  praesertim  dum  gratuitam,  qua  nos  dignatus  est,  adoptionem  reputamus.  Nam  quicunque  mentem  huc  attollunt,  iis  facile  est  placide  mala  omnia  devorare.  Unde  enim  fit  ut  moerore  animi  opprimantur,  nisi  quia  nullum  spiritualium  bonorum  gustum  habent?  Verum  qui  omnes  aerumnas  statuunt  exercitia  esse  sibi  utilia  in  salutem,  non  tantum  supra  illas  se  erigunt,  sed  etiam  vertunt  in  occasionem  gaudii.  Contristati.  Annon  etiam  reprobis  communis  est  tristitia?  neque  enim  a  malis  sunt  immunes.  Verum  Petrus  fideles  spontaneam  tristitiam  suscipere  intelligit  :  quum  fremant  impii,  et  contumaciter  obluctentur  Deo.  Tristantur  ergo  pii,  quemadmodum  bos  domitus  iugum  suscipit,  vel  equus  subactus  fraenari  se  etiam  a  puero  sustinet,  Tristitia  Deus  reprobos  afficit,  quemadmodum  equo  feroci  ac  refractario  violenta  manu  fraenum  imponitur.  Calcitrant  enim  et  contra  nituntur  :  sed  frustra.  Laudat