50:212  filiis  resectus  sit  ex  familia.  In  Isaac  vocabitur  tibi  semen:  ergo  Ismael  non  censetur.  Veniamus  ad  secundum  gradum.  An  concedent  Iudaei,  posteros  Esau  esse  benedictum  semen?  imo  contendent  patrem  ipsorum  expunctum  fuisse:  quamquam  esset  primogenitus.  Et  quot  populi  ex  stirpe  Abrahae  prodierunt,  qui  locum  in  vocatione  hac  nullum  obtinent?  Duodecim  tandem  patriarchae  totidem  fuerunt  capita:  non  quia  ex  progenie  Abrahae  descenderant,  sed  quia  speciali  Dei  electione  erant  ordinati.  Nam  ex  quo  abductae  fuerant  decem  tribus,  quam  multa  millia  sic  degeneraverunt,  ut  nomen  in  semine  Abrahae  nullum  obtineant?  Postremo  etiam  tribus  Iuda  periclitata  est:  ut  in  exiguo  populo  vera  benedictionis  successio  maneret.  Atque  ita  praedictum  fuerat  ab  Iesaia  (10,  21):  Reliquiae  tantum  salvae  fient.  Hactenus  nihil  dixi  quod  Iudaei  non  fateantur.  Respondeant  igitur  mihi,  qui  fit  ut  potius  tredecim  tribus  ortae  ex  duodecim  patriarchis  semen  Abrahae  fuerint,  quam  Ismaelitae  vel  Idumaei?  cur  nunc  hoc  nomine  soli  glorientur,  alios  tamquam  adulterinum  semen  reiiciant?  Iactabunt  quidem  id  se  consequutos  esse  suo  merito  :  verum  scriptura  exadverso  reclamat,  totum  ex  Dei  vocatione  pendere.  Nam  semper  ad  illam  praerogativam  redeundum,  In  Isaac  vocabitur  tibi  semen.  Huius  praerogativae  continua  series  valere  debuit  usque  ad  Christum.  Nam  Dominus  promissionem  Abrahae  factam,  postea  in  Davide,  quasi  postliminio  revocavit.  Paulus  ergo  non  singulari  numero  nititur,  ut  de  uno  homine  dictum  hoc  fuisse  probet:  sed  tantum  ut  ostendat  nomen  seminis  in  aliquo  residere  qui  non  tantum  natus  sit  ex  Abraham  secundum  carnem,  sed  etiam  Dei  vocatione  ad  hoc  ordinatus.  Id  Iudaei  si  inficientur,  nihil  aliud  quam  se  ridiculos  sua  pertinacia  facient.  Caeterum  quia  ex  iisdem  verbis  etiam  colligit  Paulus,  pactum  in  Christo  initum  fuisse  vel  erga  Christum:  discutiamus  quid  valeat  ista  loquutio,  in  semine  tuo  benedicentur  omnes  gentes.  Iudaei  cavillantur,  comparationem  significari:  quasi  semen  Abrahae  infaustis  ominibus  et  precationibus  exemplar  sit  futurum.  Quemadmodum  e  converso  maledicere  in  Sodoma  vel  Israele  significat  in  formulis  exsecrationum  usurpare  Sodomae  vel  Israelis  nomen.  Fateor  hoc  interdum  esse  verum,  sed  perpetuum  esse  nego:  nam  benedicere  se  in  Deo  aliud  est,  etiam  concedentibus  Iudaeis.  Quum  ergo  loquutio  sit  ambigua,  et  nunc  causam,  nunc  comparationem  significet:  quoties  occurrit,  ex  circumstantia  loci  exponenda  est.  Porro  constat  nos  maledictos  esse  omnes  natura.  Benedictio  cunctis  gentibus  promissa  est  in  manu  Abrahae.  An  omnes  promiscue  ad  eam  perveniunt?  minime  certe:  sed  ii  solum,  qui  aggregantur  ad  Messiam.  Nam  tunc  fiunt  unus  populus,  quum  in  unum  corpus  Messiae