[SEARCH HOME] | [CONTENTS] | [기독교강요 라틴어-영어 문장별 대조본] | [원문칼빈전집안드로이드앱]

IOANNIS CALVINI OPERA QUAE SUPERSUNT OMNIA
volume column dictionary *for dictionary, click or touch the word
[Pre] [Next] [Original Text Jpg]


5:212  nite,  possidete  regnum,  etc.  (Matth.  25,  34)  et  similibus.  Promptum  enim  nobis  est  respondere:  non  ideo  nunc  nullum  esse  regnum,  quia  nondum  perfectum  est.  Sed  contra  dicimus  tunc  perficiendum  esse,  quod  iam  inchoatum  est,  cuius  rei  fidem  tunc  demum  factam  a  me  volo,  ubi  planam  fecero,  ex  certis  scripturarum  argumentis.  Nam  et  dies  ille  regnum  Dei  dicitur,  quia  tunc  vere  subiiciet  sibi  potestates  adversarias,  Satanam  interficiet  spiritu  oris  sui,  et  destruet  illustratione  adventus  sui,  ipse  vero  totus  in  electis  suis  habitabit  et  regnabit  (1  Cor.  15,  24;  2  Thess.  2,  8).  Neque  enim  aliter  regnare  olim  in  se  Deus  potest,  quam  regnavit  ab  initio:  cuius  maiestati  nihil  accedere  aut  decedere  potest.  Sed  regnum  eius  dicitur,  quod  omnibus  manifestabitur.  An  vero  dum  oramus  ut  regnum  eius  adveniat,  cogitamus  nunc  nullum  esse?  Et  ubi  erit  illud?  Regnum  Dei  intra  vos  est  (Luc.  17,  21).  Regnat  igitur  Deus  iam  nunc  in  electis  suis  quos  agit  spiritu  suo.  Regnat  et  contra  diabolum,  peccatum  et  mortem,  dum  iubet  e  tenebris  lucem  splendescere,  qua  confundantur  error  et  mendacium:  et  dum  prohibet,  ne  noceant  potestates  tenebrarum  iis,  qui  signum  agni  in  fronte  gerunt.  Regnat,  inquam,  iam  nunc,  cuius  ut  regnum  adveniat,  oramus.  Regnat  quidem  dum  operatur  virtutes  in  suis,  dum  Satanae  legem  dicit.  Sed  tunc  regnum  eius  adveniet,  quum  implebitur.  Implebitur  autem,  quum  plane  manifestabit  gloriam  maiestatis  suae  electis  suis  ad  salutem,  reprobis  ad  confusionem.  Quid  autem  aliud  vel  dicendum  vel  credendum  est  de  electis?  quorum  regnum  est  et  gloria,  in  regno  Dei  glorioso  esse,  et  cum  Deo  veluti  regnare,  et  in  eo  gloriari:  denique  divinae  gloriae  participes  esse.  Hoc  quidem  regnum,  tametsi  nondum  advenisse  dicitur,  tamen  aliqua  ex  parte  spectare  licet.  Nam  in  regno  Dei  incipiunt  esse,  qui  regnum  Dei  quodammodo  intra  se  habent,  et  cum  Deo  regnant:  adversus  quos  portae  inferorum  praevalere  nequeunt  (Matth.  16,  18).  In  Deo  iustificantur,  de  quibus  dictum  est:  In  Domino  iustificabitur  et  laudabitur  omne  semen  Israel  (Ies.  45,  25).  Ut  prorsus  regnum  istud  sit  ecclesiae  aedificatio,  seu  profectus  fidelium,  quem  nobis  describit  Paulus:  qui  per  omnes  aetatum  gradus  adolescunt  in  virum  perfectum  (Ephes.  4,  13).  Vident  boni  isti  viri  huius  regni  principia,  vident  incrementa  :  statim  atque  haec  abeunt  ex  oculis,  non  dant  fidei  locum,  nec  sustinent  credere,  quod  non  habent  prae  oculis  carnis.  At  vero  longe  aliter  apostolus:  Mortui,  inquit,  estis:  et  vita  vestra  abscondita  est  cum  Christo  in  Deo.  Quum  autem  Christus  apparuerit,  vita  vestra,  tunc  et  vos  simul  cum  ipso  apparebitis  in  gloria  (Coloss.  3,  3.  4).  Vitam  quidem  absconditam  nobis  tribuit  cum  Christo,  capite  [fol.  34]  nostro,  apud  Deum:  gloriam  differt  in  diem  gloriae  Christi,  qui  ut  caput  est  ecclesiae,  trahet   

[Pre] [Next]


Copyright ⓒ 2018 In Hyuk Lee. All rights reserved. http://blog.naver.com/isaaci