1:211  [CO  1.  211]  illis  a  Domino  dictum  sit  (Ioan.  16):  multa  habeo  vobis  dicere,  quae  non  potestis  portare  modo,  scietis  autem  postea.  Et  satis  uno  exemplo  ostendi  contendunt,  quid  in  caeteris  fecerint  apostoli.  Quando  in  unum  coacti  (Act.  15),  ex  concilii  sententia,  gentibus  omnibus  denunciarunt,  ut  se  ab  idolothytis,  suffocato  et  sanguine  abstinerent.  [OS  240]  Verum  quam  frivola  sint  haec  omnia  et  plane  ludicra,  faciam  ut  nullo  negotio  perspiciant  ii,  qui  mecum  singula  ordine  dispicere  volent.  Equidem  eos  hortarer,  ut  huc  animum  serio  adverterent,  si  quid  docendo  proficere  me  apud  eos  posse  confiderem.  Sed  quando  illis,  omissa  veritatis  ratione,  hoc  unum  propositum  est:  rem  suam,  quacunque  licet  via,  agere: [p. 433]  neque  mihi  cum  illis  esse  negotium  arbitrabor.  Pauca  tantum  dicam,  quibus  sese  boni  viri  et  veri  studiosi,  quos  initio  erudiendos  suscepimus,  ab  illorum  captionibus  expedire  possint.  Tales  ergo  mihi  admonendi  sunt,  ne  ementito  ecclesiae  praetextu,  quo  sine  causa  superbiunt  isti  plusquam  sontici  et  capitales  ecclesiae  hostes,  commoveantur.  Neque  enim  aliud  praetendunt,  quam  Iudaeos  olim  obtendisse  apparet,  cum  a  prophetis  Domini,  caecitatis,  impietatis,  idololatriae  arguerentur.  Nam  ut  illi  templum,  caeremonias,  sacerdotia  gloriose  iactabant,  quibus  rebus  ecclesiam,  magno  (ut  sibi  videbantur)  argumento,  metiebantur,  ita  pro  ecclesia  externae  quaedam  larvae  nunc  nobis  opponuntur,  quae  longe  saepe  absunt  ab  ecclesia  et  citra  quas  ecclesia  optime  1)  constare  potest.  Quare  neque  alio  argumento  refutandi  nobis  sunt,  quam  quo  adversus  illam  stultam  Iudaeorum  confidentiam  contendebat  Ieremias;  nempe,  ne  glorientur  in  verbis  mendacibus  dicentes,  templum  Domini,  templum  Domini,  templum  Domini  est.  Quando  nihil  Dominus  alicubi  suum  agnoscit,  nisi  ubi  verbum  suum  auditur,  ac  religiose  observatur  (Ier.  7).  Haec  enim  perpetua  est  nota,  qua  signavit  suos  Dominus  noster:  qui  est  ex  veritate,  inquit,  audit  vocem  meam  (Ioan.  10.  18);  item:  ego  sum  pastor  ille [p. 434]  bonus,  et  cognosco  oves  meas  et  cognoscor  a  meis.  Oves  meae  vocem  meam  audiunt  et  ego  cognosco  eas  et  sequuntur  me.  Paulo  autem  ante  dixerat,  oves  pastorem  suum  sequi,  quia  noverunt  vocem  eius,  alienum  autem  non  sequi,  sed  effugere  ab  eo,  quia  non  noverunt  vocem  alienorum.  Quid  igitur  sponte  in  censenda  ecclesia  insanimus,  cum  eam  minime  dubio  symbolo  designarit  Christus?  Quod  ubicunque  spectatur,  fallere  non  potest,  quin  illic  ecclesiam  certo  ostendat;  ubi  vero  abest,  nihil  restat  quod  veram  ecclesiae  significationem  dare  possit.  Quin  potius  Ieruschalam  a  Baby-  1)  Perperam  archetypum:  optima.  Edd.