55:210  vocando,  hac  nota  a  diis  omnibus  fictitiis  discerni  voluit:  ita  postquam  se  manifestavit  in  filio  suo,  non  aliter  quam  in  ipso  vult  cognosci.  Itaque  qui  nudam  Dei  maiestatem  extra  Christum  mente  concipiunt,  idolum  habent  loco  Dei:  sicuti  Iudaei  et  Turcae.  Proinde  quisquis  verum  Deum  vere  cognoscere  cupit,  hoc  patris  Christi  titulo  ipsum  vestiat.  Nisi  enim  quoties  mens  nostra  Deum  quaerit,  Christus  occurrat,  vaga  et  confusa  errabit,  donec  prorsus  deficiat.  Simul  etiam  indicare  Petrus  voluit  quomodo  tam  liberalis  et  beneficus  erga  nos  sit  Deus.  Nisi  enim  medius  statuatur  Christus,  nunquam  illius  bonitas  serio  a  nobis  sentiri  poterit.  Qui  regenuit  nos.  Significat  vitam  supernaturale  esse  donum:  quia  filii  irae  nascimur.  Nam  si  in  spem  vitae  geniti  essemus  secundum  carnem,  supervacuum  esset  nos  regigni  a  Deo.  Docet  itaque  Petrus,  nos  qui  natura  morti  aeternae  eramus  destinati,  in  vitam  Dei  misericordia  restitutos  esse.  Haec  autem  veluti  secunda  est  creatio:  quemadmodum  Ephesiorum  primo  habetur.  Spes  viva  pro  spe  vitae  capitur:  quamquam  videtur  tacita  esse  antithesis  inter  spem,  quae  in  regno  Dei  incorruptibili  defixa  est,  et  inter  spes  hominum  fluxas  ac  evanidas.  Secundum  multam  misericordiam.  Primo  causam  efficientem  ponit:  deinde  medium  (ut  loquuntur)  designat.  Deum  inquam  nullis  nostris  meritis  fuisse  provocatum  docet,  ut  nos  regeneraret  in  spem  vivam:  quia  hoc  totum  eius  misericordiae  assignat.  Atque  ut  melius  operum  merita  redigat  in  nihilum,  dicit  multam  misericordiam.  Fatentur  quidem  omnes  Deum  esse  unicum  salutis  nostrae  autorem:  sed  extraneas  causas  postea  affingunt,  quae  tantundem  eius  misericordiae  detrahant.  Petrus  vero  solam  misericordiam  commendat,  sed  modum  protinus  adscribit,  nempe  resurrectionem  Christi.  Neque  enim  alibi  aut  aliter  suam  erga  nos  misericordiam  explicat  Deus:  ideo  semper  ad  hunc  scopum  scriptura  nos  dirigit.  Quod  autem  praeterita  Christi  morte,  solam  resurrectionem  commemorat,  in  eo  nihil  est  absurdi.  Illa  enim  sub  hac  includitur,  quia  perfectio  non  constat  sine  suo  initio:  resurrectionem  vero  potius  adduxit,  quia  de  nova  vita  agebat.  4.  In  haereditatem.  Tria  epitheta,  quae  sequuntur,  ad  gratiae  Dei  amplificationem  posita  sunt.  In  hoc  enim  laborat  Petrus  (quemadmodum  prius  dixi)  ut  eius  excellentiam  animis  nostris  bene  ac  penitus  infigat.  Porro  haec  duo  membra,  in  haereditatem  incorruptibilem,  et  in  salutem  quae  parata  est  revelari,  appositive  lego,  ut  posterius  sit  prioris  expositio.  Nam  rem  unam  duobus  modis  exprimit.  Singulis  verbis,  quae  sequuntur,  suum  inest  pondus.  Haereditas  dicitur  in  coelis  conservata,  ut  sciamus  eam  esse  extra  U