52:210  probi,  qui  tamen  in  Christianorum  grege  censeri  volunt,  non  omnium  esse  fidem.  Imo  quum  interdum  audimus  turbari  pravis  factionibus  ecclesias,  sit  hic  nobis  clypeus  adversus  eiusmodi  scandala.  Non  enim  solum  piis  doctoribus  saepe  erimus  iniurii,  si  de  eorum  fide  dubitemus,  quoties  illis  domestici  hostes  iniuriam  facessunt:  sed  subinde  vacillabit  fides  nostra,  nisi  multos  in  iis,  qui  Christianorum  nomen  iactant,  perfidos  esse  meminerimus.  3.  Fidelis  autem  Dominus.  Quoniam  fieri  poterat  ut  sinistris  rumoribus  perculsi  eorum  animi  in  aliquam  dubitationem  de  Pauli  ministerio  venirent:  postquam  admonuit,  non  semper  inveniri  fidem  in  hominibus,  ipsos  ad  Deum  revocat,  ac  fidelem  esse  dicit,  qui  eos  confirmet  adversus  omnes  hominum  machinas,  quibus  eos  concutere  molientur.  Ac  si  diceret  :  Illi  quidem  perfidi  :  sed  firma  satis  in  Deo  fultura  est,  ne  incidatis.  Fidelem  Dominum  appellat,  qui  sibi  usque  in  finem  constat  in  tuenda  suorum  salute,  illis  in  tempore  opitulatur  et  nunquam  in  periculis  deserit.  Sicuti  ad  Corinthios  (1.  Ep.  10,  13),  Fidelis  Dominus  qui  non  sinet  vos  tentari  supra  quam  ferre  possitis.  Caeterum  de  aliis  magis  quam  de  se  anxium  fuisse  Paulum,  ostendunt  haec  ipsa  verba.  In  eum  maligni  homines  improbitatis  suae  aculeos  dirigebant,  in  eum  totus  impetus  irruebat:  curam  interea  suam  ad  Thessalonicenses  convertit,  ne  quid  haec  illis  tentatio  noceat.  Nomen  maligni  tam  ad  rem,  hoc  est  malitiam,  quam  ad  personas  improborum  referri  potest.  Ego  tamen  de  Satana  improborum  omnium  capite  libenter  interpretor.  Parum  enim  foret  ab  astu  aut  violentia  hominum  eripi,  nisi  nos  Dominus  ab  omni  spirituali  noxa  protegeret.  4.  Confidimus.  Hac  praefatione  transitum  sibi  facit  ad  praeceptionem  quam  mox  subiiciet.  Fiducia  enim,  quam  se  de  illis  habere  dicit,  multo  eos  reddebat  promptiores  ad  parendum,  quam  si  obedientiam,  quasi  dubitans  aut  diffidens,  postulasset.  Spem  vero  hanc,  quam  de  illis  concepit,  dicit  in  Domino  esse  fundatam:  quoniam  illius  est  corda  flectere  ad  submissionem  et  in  ea  retinere.  Vel  hac  voce  (quod  mihi  probabilius  est)  testari  voluit,  non  esse  sibi  in  animo  quidquam  mandare,  nisi  ex  imperio  Domini.  Ergo  hoc  et  sibi  iubendi  et  illis  parendi  terminos  statuit,  ne  quid  nisi  in  Domino.  Quicunque  ergo  hanc  modestiam  non  tenent,  frustra  obtendunt  Pauli  exemplum,  ut  ecclesiam  legibus  suis  adstringant  ac  subiiciant.  Forte  huc  etiam  spectavit,  ut  salva  apud  Thessalonicenses  maneat  apostolatus  sui  reverentia,  quantumvis  improbi  eius  honorem  deiicere  conentur.  Nam  precatio,  quam  statim  subnectit,  in  hunc  tendit  finem.  Modo  enim  corda  ad  Dei  amorem  et  Christi  patientiam  formata  maneant,  reliqua  bene  habebunt  :  seque  Paulus