50:210  sed  maledictionem,  quod  plus  est.  Nam  significat  omnium  maledictionem  in  ipso  fuisse  inclusam.  Si  cui  hoc  videtur  durum,  pudeat  etiam  ipsum  crucis  Christi,  cuius  confessione  gloriamur.  Neque  enim  nesciebat  Deus,  qualis  futura  esset  mors  filii  sui,  quum  hoc  pronuntiabat,  maledictus  omnis  qui  pependerit  in  ligno.  Sed  obiiciat  quispiam,  qui  fit  ut  filius  patri  dilectus  maledicatur?  Respondeo,  duo  consideranda  esse  non  tantum  in  persona  Christi,  sed  etiam  in  humanitate  ipsius.  Alterum,  quod  erat  agnus  Dei  immaculatus,  plenus  benedictione  et  gratia:  alterum,  quod  personam  nostram  susceperat:  ideoque  peccator  erat  et  maledictionis  reus,  non  tam  in  se  quidem  quam  in  nobis:  sed  tamen  ut  necesse  haberet  nostro  nomine  defungi.  Itaque  neque  extra  Dei  gratiam  esse  potuit,  et  tamen  sustinuit  iram  eius.  Nam  qualiter  patrem,  quem  habuisset  infestum,  et  cui  fuisset  exosus,  reconciliare  nobis  poterat?  Ergo  semper  voluntas  patris  in  illo  acquievit.  Rursus  quomodo  ab  ira  Dei  nos  liberasset,  nisi  eam  a  nobis  transtulisset  in  se  ipsum?  Ideo  percussus  fuit  propter  peccata  nostra,  et  Deum  expertus  est  tanquam  iratum  iudicem.  Haec  est  stultitia  crucis,  angelis  etiam  admiranda:  quae  non  tantum  superat,  sed  absorbet  etiam  omnem  mundi  sapientiam.  14.  Ut  in  gentes  benedictio.  Propius  ad  suum  institutum  accommodat  quod  dixit,  nos  liberatos  esse  per  Christum  a  maledictione  legis  :  nempe  benedictionem  Abrahae  promissam,  in  eo  fundatam  esse:  et  proinde  ad  gentes  pervenire.  Nam  si  Iudaeos  oportet  a  lege  liberari  ut  fiant  Abrahae  haeredes,  quid  gentes  impediet  quominus  potiantur  eodem  bono?  Deinde  si  in  solo  Christo  est  ista  benedictio,  sola  est  fides  in  Christum,  quae  nos  facit  eius  participes.  Ut  promissionem  spiritus.  Promissionem  spiritus  accipio  pro  spirituali,  more  hebraico.  Quamquam  enim  ista  promissio  ad  novum  testamentum  pertinet:  Effundam  de  spiritu  meo  super  omnem  carnem:  Paulus  tamen  hoc  loco  aliud  respexit.  Spiritum  enim  mihi  videtur  opponere  rebus  omnibus  externis:  neque  caeremoniis  duntaxat,  sed  carnali  etiam  generationi:  ut  personae  hic  nullum  habeant  locum.  Ergo  ex  natura  promissionis  demonstrat,  Iudaeos  nihil  differre  agentibus:  quia  si  spiritualis  est,  sola  fide  percipitur.  15.  Fratres,  (secundum  hominem  dico)  hominis  licet  pactum,  tamen  si  sit  comprobatum,  nemo  reiicit,  aut  addit  aliquid.  16.  Porro  Abrahae  dictae  sunt  promissiones  et  semini  eius:  non  dicit:  et  seminibus,  tanquam  de  multis,  sed  tanquam  de  uno:  et  semini  tuo,  qui  est  Christus.  17.  Hoc  autem  dico,  pactum  ante  comprobatum  a  Deo  erga  Christum,  lex,  quae  post  annos  quadringentos  et  triginta  coepit,  non  facit  irritum,  ut  abroget  promissionem.  18.  Nam  si  ex  lege  14