40:21  21  IN  VlGINTI  PRIMA  EZECHIELIS  PROPHETAE  CAPITA,  IOANNIS  CALVINI  PRAELECTIONES.  Quo  tempore  Ezechiel  functus  fuerit  prophetae  officio,  ipse  statim  ab  initio  libri  exponit,  et  inde  pendet  cognitio  argumenti.  Nisi  enim  tenemus  quorsum  Deus  illum  excitaverit,  vix  poterimus  assequi  eius  mentem,  ac  multo  minus  percipere  iustum  fructum  ex  doctrina.  Hinc  ergo  incipere  necesse  est,  hoc  est  a  tempore.  Dicit  autem,  CAPUT  L  1.  Et  fuit  tricesimo  anno,  quarto  mense,  quinta  mensis,  et  ego  (hoc  est,  quum  ego  essem)  in  medio  captivitatis  (inter  captivos)  super  fluvium  Chebar,  aperti  sunt  coeli,  et  vidi  visiones  Dei.  2.  In  quinta  (mensis),  ipse  est  annus  quintus  captivitatis  regis  Ioiakim.  Videmus  ergo  prophetam  nostrum  vocatum  fuisse  ad  docendi  munus  quinto  anno  postquam  sponte  se  dediderat  Ioiakim  regi  Babylonio,  et  fuerat  in  exsilium  tractus  una  cum  matre.  Dicit  autem  annum  illum  fuisse  tricesimum.  Maior  pars  post  chaldaicum  Paraphrasten  intelligit  a  reperto  libro  legis.  Satis  convenit,  annum  illum  fuisse  duodevigesimum  regis  Iosiae:  sed  in  supputatione  non  subscribo  eorum  opinioni,  qui  subaudiunt  a  libro  legis  reperto.  Esset  enim  haec  loquutio  nimis  obscura  et  coacta,  vocari  annum  tricesimum.  Nusquam  legimus  posteros  illinc  fecisse  numerandi  initium.  Iam  minime  dubium  est  quin  apud  Iudaeos  fuerit  haec  trita  ratio,  ut  inciperent  annos  a  iubilaeo.  Erat  enim  quaedam  renovatio  ad  aetatem  futuram.  Ego  itaque  non  dubito  annum  vocari  tricesimum  a  iubilaeo.  Neque  hoc  est  novum  commentum.  Nam  apud  Hieronymum  fit  eius  rei  mentio,  tametsi  perperam  repudiat  quod  rectum  est,  quia  deceptus  erat  diversa  opinione.  Sed  quum  illud  certum  sit,  Iudaeos  fuisse  usos  hac  ratione