1:21  [CO  1.  21]  alia  nota  contineri, [p. 28]  nempe:  pura  verbi  Dei  praedicatione  et  legitima  sacramentorum  administratione.  Fremunt,  nisi  ecclesia  semper  digito  ostendatur.  Sed  quam  saepe  in  populo  Iudaeorum  sic  deformari  contigit,  ut  nulla  species  emineret?  Quam  putamus  formam  resplenduisse,  cum  Elias  solum  se  relictum  deploraret  (1  Reg.  19)?  Quamdiu  ab  adventu  Christi  deformis  latuit?  Quoties  ab  eo  tempore  bellis,  seditionibus,  haeresibus  sic  oppressa  est,  ut  nulla  parte  fulgeret?  An,  si  eo  tempore  vixissent,  credidissent  ullam  esse  ecclesiam?  Sed  audivit  Elias,  salva  esse  septem  millia  virorum,  qui  non  curvaverant  genu  ante  Baal.  Nec  dubium  nobis  esse  debet,  quin  semper  in  terris  regnaverit  Christus,  ex  quo  coelum  ascendit.  Notabilem  aliquam  formam  si  tum  pii  oculis  requisissent,  nonne  protinus  concidissent  animis?  Permittamus  igitur  hoc  Domino,  ut  quando  solus  ipse  novit  qui  sui  sint  (2  Tim.  2),  interdum  etiam  ecclesiae  suae  exteriorem  notitiam  ab  hominum  aspectu  auferat.  Est,  fateor,  horribilis [p. 29]  illa  Dei  vindicta  super  terram.  Sed  si  ita  meretur  hominum  impietas,  cur  divinae  iustitiae  obsistere  nitimur?  Sic  anteactis  saeculis  Dominus  hominum  ingratitudinem  ultus  est.  Nam  quia  veritati  suae  obedire  noluerant  et  lucem  suam  extinxerant,  eos  excaecato  sensu,  et  absurdis  mendaciis  ludi,  et  altis  tenebris  immergi  passus  est,  ut  nulla  verae  ecclesiae  facies  extaret.  Interim  tamen  suos  et  dispersos  et  delitescentes  in  [OS  32]  mediis  erroribus  et  tenebris  servavit.  Nec  mirum.  Didicit  enim  servare  et  in  ipsa  confusione  Babylonis,  et  flamma  fornacis  ardentis.  Quod  autem  formam  ecclesiae  nescio  qua  vana  pompa  censeri  volunt,  id  quam  periculosum  sit,  paucis  indicabo  magis  quam  enarrabo,  ne  orationem  in  immensum  extraham.  Papa,  inquiunt,  Romanus,  qui  sedem  apostolicam  tenet,  et  episcopi  alii  ecclesiam  repraesentant,  et  pro  ecclesia  haberi  debent,  ideo  nec  errare  possunt.  Qui  sic?  Quia  pastores  sunt  ecclesiae,  et  consecrati  Domino.  Et  Aaron,  caeterique  praefecti [p. 30]  Israel,  pastores  erant.  Aaron  (Exod.  31  et  32)  et  filii  eius,  iam  sacerdotes  designati,  erraverunt  tamen  cum  vitulum  fabricaverunt.  Cui,  secundum  hanc  rationem,  ecclesiam  non